Хүний эрхийн Үндэсний комисстой “Санамж бичиг” байгуулан ажиллаж буй байгууллагуудын тайлан уулзалт өнөөдөр Улаанбаатар хотын цагдаагийн газрын хурлын танхимд боллоо.

Тайлангийн хурал, уулзалтад Монгол Улсын Хүний эрхийн Үндэсний комиссын дарга Ж.Бямбадорж, тус комиссын гишүүн П.Оюунчимэг, ЦЕГ-ын Төлөвлөлт, зохион байгуулалтын хэлтсийн дарга, хурандаа Ж.Баясгалан, ЗХЖШ-ын ажиллагааны удирдлагын газрын ахлах мэргэжилтэн, хурандаа Т.Ганбат, ШШГЕГ-ын Захиргаа, удирдлагын хэлтсийн дарга, хурандаа М.Алтан-Очир, ХХЕГ-ын Тамгын хэлтсийн дарга, хурандаа Д.Мэндсайхан, МХЕГ-ын Хөдөлмөр, нийгмийн хамгааллын хяналтын газрын хяналтын хэлтсийн дарга Г.Эрдэнэтөгс нарын албаны хүмүүс оролцов.

“Хамтран ажиллах санамж бичиг”-ийн хүрээнд цагдаагийн байгууллагаас УБХЦГ-ын харьяа дүүрэг дэх цагдаагийн хэлтсүүдийн хэрэг бүртгэгч, мөрдөн байцаагчдыг “Хүний эрхэд суурилсан хандлага төлөвшүүлэх” сургалтад хамруулсан байна. Мөн ХСИС-ийн 2016 оны төгсөгч, 177 алба хаагчид “Ажлын чиг баримжаа олгох” модулийн сургалт явуулж, Хүний эрхийн Үндэсний комиссын гишүүн П.Оюунчимэг “Хүний эрх, жендерийн тэгш байдлыг хангах” сэдвээр тусгайлан хичээл оржээ.

Мөн тайлангийн уулзалтын үеэр санамж бичгийн хүрээнд хамтран ажиллаж буй байгууллагуудын хүний эрхийг хамгаалах чиглэлээр зохион байгуулсан үйл ажиллагааны зургууд болон бүтээлийн үзэсгэлэн дэлгэгдэв.