Өвөрхангай аймаг дахь Цагдаагийн газраас хүнд өвчний улмаас хөдөлмөрийн чадвараа алдсан ахмад настан, цагдаагийн бэлтгэл хошууч Д.Гаваад иж бүрэн таван ханатай, давхар бүрээстэй, тавилгатай шинэ гэр, хашаа бэлэглэжээ.

Уг гэр, хашааг алба хаагчдын сайн үйлсийн хандив, Арвайхээр, Баруунбаян-Улаан сумын Засаг дарга нарын дэмжлэгээр нэг сарын хугацаанд бүтээж, босгосон байна. Гэр гардуулах үйл ажиллагаанд цагдаагийн газрын нийт бие бүрэлдэхүүн, ахмадууд, Арвайхээр, Баруунбаян-Улаан сумын Засга дарга нар болон бэлтгэл хошууч Д.Гаваагийн гэр бүлийнхэн оролцжээ. Энэхүү ажилд сэтгэл гарган, дэмжсэн Арвайхээр, Баруунбаян-Улаан сумын Засаг дарга нарт дурсамж, “Цагдаагийн газрын түүхэн товчоон-2” номыг Цагдаагийн газрын дарга, дэд хурандаа Я.Ганбат гардуулсан байна.

Цагдаагийн бэлтгэл хошууч Д.Гаваа нь тус аймгийн Баруунбаян-Улаан суманд хэсгийн төлөөлөгчөөр ажиллаж байхдаа 2006 онд тархинд цус харваж хөгжлийн бэрхшээлтэй болсон аж. Энэ үйл ажиллагаа нь цагдаагийн албанд залуу нас, хүч хөдөлмөрөө зориулан, төр, ард түмнийхээ төлөө зүтгэсэн нэгэн ахмад алба хаагчдаа сэтгэлийн дэм хайрласан үйл явдал боллоо гэж Өвөрхангай аймаг дахь Цагдаагийн газраас мэдээлэв.