ЦАГДААГИЙН ДЭД  ХУРАНДАА ГЭНДЭНЖАМЦ ОВОГТОЙ НЭРГҮЙ

 Монголын цагдаагийн байгууллагын ариун эгнээнээс төрж гарсан эрхэм буурлуудын нэг, цагдаагийн дэд хурандаа Г.Нэргүй өвчний учир таалал төгслөө. 1949 оны 05 дугаар сарын 30-ны өдөр Төв аймгийн Сэргэлэн сумын “Бор өндөр” хэмээх газарт төржээ.
1958-1968 онд Төв аймгийн 10 жилийн дунд сургууль, 1968 онд Төв аймгийн Артельд мужааны 4 сарын курс, 1973-1974 онд ЗХУ-ын Росдов на Дону хот дахь Дотоод Явдлын Яамны төв сургуулийн нохойн албаны сургууль төгссөн юм.
1965-1968 онд Төв аймгийн Артельд мужаан, 1968-1974 онд Дулааны 3 дугаар цахилгаан станцад гэрээт сэргийлэгч, 1974-1984 онд Дархан хотын Цагдан сэргийлэх ангид нохойн төлөөлөгч, 1984-1994 онд Мөрдөн байцаагч, 1994-1997 онд Мөрдөн байцаах тасгийн дарга, 1997-2000 онд “Дархан-Гурил” тэжээлийн үйлдвэрт харуулын албаны дарга, 2000-2012 онд “Дархан Сэлэнгийн Цахилгаан Түгээх Сүлжээ” ХК-ны гэрээт цагдаагийн хэсэгт ахлах байцаагч, 2014 оноос Аймгийн Иргэдийн Төлөөлөгчдийн Хурлын дэргэдэх Иргэний зөвлөлийн даргаар тус тус ажиллаж байжээ.
Цэргийн гавьяаны улаан тугийн одон, Байлдааны гавьяаны одон, Байлдааны медаль, Ардын хувьсгалын 70,80,90 жилийн ойн медаль, Хууль зүйн албаны “Тэргүүний ажилтан” цол тэмдэг, “Цагдаагийн гавьяа”тэмдэг, “Цагдаагийн албаны төлөө 1” медаль , “Найрамдалын Дархан” хүндэт тэмдэгээр шагнагдан, 1990-1992 онд Дархан хотын Найрамдал хорооны 20 дугаар тойргийн депутатаар сонгогдож, Дархан хот дахь Нийгмийг Аюулаас Хамгаалах Газрын 1985,1987 оны ажил мэргэжлийн аварга, тус хотын “Хууль хяналтын байгууллагуудын 1986 оны “Тэргүүний ажилтан”, Улсын Цагдан Сэргийлэх Ерөнхий Газрын1987, 1988 оны хөдөлмөрийн аварга, Нийгмийг Аюулаас Хамгаалах Яамны 1989 оны хөдөлмөрийн аварга, Дархан хотын 1990 оны хөдөлмөрийн аварга, Цагдаагийн Ерөнхий Газрын 1991 оны хөдөлмөрийн аваргаар шалгарч байсан түүхтэй.
Аливаад хөдөлмөрч, чин шударгуу буурал дэд хурандаагийн маань хийж бүтээсэн байгуулсан бүхэн үеийн үед мөнхөд дурсагдах болтугай.