ЦЕГ-ын Олон нийтийн аюулгүй байдлыг хангах албаны Хамгаалалтын нэгдүгээр газрын Тусгай хамгаалалтын хэлтсийн нэрэмжит “Аравтаар ажиллах-тусгай бэлтгэл” сургалт дадлагын тэмцээн өнгөрөгч баасан гарагт /2016.11.11/ Аврах, гал унтраах 29 дүгээр ангийн бэлтгэлийн талбайд боллоо.

Сургалт, дадлагын тэмцээний нээлтийн үеэр Хамгаалалтын нэгдүгээр газрын Тусгай хамгаалалтын газрын дарга, дэд хурандаа Б.Галбаатар “Цагдаагийн алба хаагчдад заавал байх ёстой мэдлэг, чадварыг аравт буюу багаар ажиллах тактикаар шалгаж, цаг хугацаа, нормативын дагуу биелүүлүүлж байгаа нь ач холбогдолтой. Олон нийтийг хамарсан эмх замбараагүй байдлын үед “Аравт” хариуцсан офицерийн зааврын дагуу нэг хүн мэт, нэг баг болж ажиллах ёстой байдаг. Цаашлаад 20-т, 100-т, 200-т болж үүрэг гүйцэтгэдэг. Тэгэхээр энэ тэмцээн алба хаагчдын хамтын ажиллагаа, хариуцсан офицерийн зохион байгуулалтыг харуулна” гэж ярьсан.

“Аравтаар ажиллах-тусгай бэлтгэл” сургалт дадлагын тэмцээнд Хамгаалалтын нэгдүгээр газрын таван хэлтсийн 10 баг оролцож цас хялмаалсан хүйтэн өдрийг эс тоон эр зориг, авхаалж самбаа шалгасан таван цэгт мөн төрлийн даалгаврыг биелүүлж өрсөлдлөө. Алба хаагчид хамгаалалтын хувцас өмсөх, олон нийтийг хамарсан эмх замбараагүй байдал үүссэн үед аравтаар ажиллах тактик, саадтай зурвасыг туулах, хорт утаанаас хүн аврах, шархдсан иргэнийг тээвэрлэлт хийн хүргэх гэсэн таван даалгаврыг гүйцэтгэсэн. “Тэмцээнд оролцогчдын дундаж хурд 26 минут байна” гэж шүүгчид хэлж байлаа.

Хамгаалалтын нэгдүгээр газрын тусгай хамгаалалтын хэлтсийн 3 дугаар тасгийн цагдаа, цагдаагийн дэд ахлагч Ц.Мөнхбат “Энэ жилийн тэмцээн цаг агаарын цастай, хүйтэн өдөр болж байгаа нь оролцогчдын хурд хүч, авхаалж самбаа, тэсвэр тэвчээрийг илүү шалгаж байна. Манай багийнхан бэлтгэлээ сайн базаасны ачаар торгууль, алдаа авсангүй даалгавраа амжилттай гүйцэтгэлээ. Өөрөө 7 кг жинтэй хамгаалалтын хувцас өмсөж, дээрээс нь хамгийн багадаа 65 кг жинтэй, 7 кг хамгаалалтын хувцастай хүнийг тээвэрлэж гурван удаа гүйх даалгавар амаргүй байлаа” гэв.

Алба хаагчдын албаны бэлэн байдал, бие бялдарын бэлтгэлжилт, үүрэг гүйцэтгэх ур чадвар, тусгай бэлтгэлийг шалгасан тус тэмцээнд цагдаагийн хошууч Н.Олонбаяр даргатай тусгай хамгаалалтын хэлтсийн IV тасгийн алба хаагчид 3 дугаар байр, цагдаагийн хошууч Ж.Алтангэрэл даргатай төрийн хамгаалалтын хэлтсийн алба хаагчид 2 дугаар байр, цагдаагийн хошууч Р.Ганчулуун даргатай тусгай хамгаалалтын хэлтсийн V тасгийн алба хаагчид тэргүүн байрт шалгарсан юм.