"ЦАГДАА" ЭМХТГЭЛИЙН  2016 ОНЫ  3-Р УЛИРЛЫН ДУГААР ХЭВЛЭГДЭН ГАРЛАА

Эх орны дөрвөн зүг найман зовхист үүрэг гүйцэтгэж байгаа алба хаагч та бүхэндээ энэ удаагийн дугаараар 2016 оны 3-р улирлын онцлох үйл ажиллагааг тоймлон хүргэж байна.
Сэтгүүлийнхээ зочиноор Улаанбаатар хотын цагдаагийн байгууллага үүсэж хөгжсөний түүхт 90 жилийн ойн босгон дээр түүхэн үйл явдлыг эмхтгэн ном бүтээх ажлыг зохион байгуулсан цагдаагийн хурандаа Ч.Ганболдыг урьж, “Цагдаагийн түүх бол Монгол Улсын түүхийн салшгүй том хэсэг” түүхэн баримт мэдээллээр дүүрэн сонирхолтой ярилцлагыг хүргэж байна.
“Дугаарын сурвалжлага” булангаараа Цагдаагийн байгууллагын түүхт 95 жилийн ойн фото сурвалжлагыг хүргэн, “Үйл явдлын хураангуй”, “Дөрвөн зүг найман зовхист” буландаа онцлох үйл явдлуудыг тоймлон, “Тэмдэглэлт үйл явдал буландаа” Мөрдөн байцаах албаны түүхт 70 жилийн ой, Ховд аймаг дахь цагдаагийн газар байгуулагдсаны түүхт 80 жилийн ой, Замын цагдаагийн газар байгуулагдсаны 90 жилийн ойг онцлон түүхэн эх сурвалж, гэрэл зураг бусад үйл явдлын хураангуйг онцлон нийтэллээ.
Харин “Түүх архив” буландаа “Орчин үеийн цагдаагийн байгууллагын үүсэл”-ийн талаар бэлтгэж, “Соён гэгээрүүлэх ажил” буландаа Цагдаагийн ерөнхий газрын сургалтын төвийн үйл ажиллагааг сурвалжилж, “Харих болоогүй аав” буландаа мөрдөн байцаагч, цагдаагийн дэд хурандаа Н.Ганболдыг урьж, “Судалгааны өгүүлэл” булангаараа Мансууруулах болон сэтгэцэд нөлөөлөх бодистой холбоотой асуудлыг цогцоор нь шийдвэрлэх зарим арга замууд сэдвийг хөндлөө.
“Шинэ техник” булангаараа Мэдээлэл, технологийн төвөөс 2016 онд нэвтрүүлсэн програм хангамжууд, “Ахмадын үг” буландаа цагдаагийн бэлтгэл хурандаа О.Шагдарсүрэнгийн удирдах ажилтны талаар дурсамж зөвлөмж, “Энхийг сахиулагч” буландаа БНӨСУ дахь НҮБ-ын Энхийг сахиулах ажиллагааны 5-р ээлжийн мотобуудлагын батальонд цагдаагийн алба хаагчид үүргээ нэр төртэй биелүүлж ирсэн талаарх мэдээллийг тус тус нийтэллээ.