Гэрээс нь LCD зурагт, мөнгөн тоногтой эмээл, зөөврийн компьютер, гараашаас нь автомашин хулгайлсан гэмт этгээдийг энэ сарын 5-ны өдөр цагдаагийн алба хаагчид шуурхай илрүүлэн, барьсан. Тэгвэл өчигдөр хулгайд алдагдсан эд зүйлийг эздэд нь хүлээлгэн өгсөн байна.

Гэмт хэргийн мэдээлэл хэрэг гарснаас хоёр хоногийн дараа цагдаагийн байгууллагад ирсэн ч цагдаагийн алба хаагчид түргэн шуурхай ажиллаж, хэргийг илрүүлсэн юм.

Эрүүгийн төлөөлөгч ахлах дэслэгч С.Оргил, эрүүгийн төлөөлөгч дэслэгч Б.Даваадорж, ахлах ахлагч Э.Энхзол нар дуудлагын дагуу шалгаж 25 настай, эрэгтэй Х гэгч нь уг гэмт хэргийг үйлдсэнийг илрүүлэн, Баянзүрх дүүрэг дэх цагдаагийн гуравдугаар хэлтэст шалгаж байна. Шуурхай, чадварлаг ажиллаж, иргэддээ туслан албан үүргээ амжилттай биелүүлсэн алба хаагчдадаа баяр хүргэе.