Хууль зүйн салбарын шинэчлэлийн хүрээнд Цагдаагийн байгууллагад хуулиар харьяалуулсан тусгай зөвшөөрөл олгох, хяналт тавихтай холбогдсон бүртгэл, мэдээллийн цогц үйл ажиллагааг бий болгох, иргэн, аж ахуйн нэгж, байгууллагад үзүүлэх үйлчилгээг нэг цэгт төвлөрүүлж түргэн шуурхай, чирэгдэлгүй үзүүлэх, нэгдсэн мэдээллийн сан бүрдүүлэх зорилгоор Цагдаагийн ерөнхий газрын Лицензийн төвийг байгуулсан.

Тус төвийн Мэргэжил хяналтын хэсэг нь Нийслэлийн 6 дүүргийн жолооч бэлтгэх автосургуулийн төгсөгчид, ангилал ахиулсан жолооч, тээврийн хэрэгсэл жолоодох эрх нь хасагдсан, зөрчлийн оноо дууссан жолооч нараас шалгалт зохион байгуулах, эрх сэргээх, үрэгдүүлсэн болон солиулах хүсэлтэй иргэдийн үнэмлэх хэвлэн олгох, Зөвшөөрөл, хяналтын хэсэг нь галт зэвсэг, галт зэвсэгтэй адилтгах хэрэгсэл, нэг бүрийн болон хамгаалах тусгай хэрэгсэл улсын хилээр нэвтрүүлэх, тусгай дуут болон гэрэл дохио хэрэглэх, овор ихтэй болон аюултай ачаа тээвэрлэх, гэрээт харуул хамгаалалтын үйл ажиллагаанд хяналт тавин ажилдаг.
Мэдээллийн технологи, шуудан, харилцаа холбооны газраас хэрэгжүүлж буй төрийн үйлчилгээг иргэдэд шуурхай, зардал багатай хүргэх “Цахим болон мобайл технологид суурилсан програм хангамжийн нэгдсэн үйлчилгээний портал систем хөгжүүлэх төсөл”-ийн хүрээнд Цагдаагийн ерөнхий газрын Лицензийн төвөөс үзүүлж буй тээврийн хэрэгслийн жолоочийн мэргэжлийн шалгалт авах, үнэмлэх олгох, жолоодох эрх сэргээх, үнэмлэх нөхөн олгох, жолоочийн үнэмлэх солих, гадаадын иргэнд жолооны үнэмлэх сольж олгох, жолоочийн лавлагаа гэсэн 6 үйлчилгээг цахим хэлбэрт шилжүүлэх ажлыг амжилттай зохион байгуулсан. Энэ ажлын хүрээнд тээврийн хэрэгсэл жолоодох эрхийн үнэмлэхээ солиулах, үрэгдүүлж нөхөн авахаар захиалга өгсөн иргэнээс сайн дурын үндсэн дээр шуудангийн хүргэлтийн үйлчилгээг авах хүсэлтийг үндэслэн жолоодох эрхийн үнэмлэхийг хаягаар хүргүүлэх, хүлээлгэн өгөх ажлыг зохион байгуулахаар 2016 оны 10 дугаар сарын 24-ны өдөр “Монгол Шуудан” ХК-ны гүйцэтгэх захирал Б.Амарбаатар ЦЕГ-ын дэд дарга, цагдаагийн хурандаа М.Лувсандорж нар гэрээнд гарын үсэг зурсан.

Гэрээний зорилого нь үйлчилгээг хүргэхдээ иргэдийн хүсэл, сонирхолд тулгуурлан сайн дурын үндсэн дээр “жолоодох эрхийн үнэмлэх”-ийг хаягаар хүргэх үйлчилгээг түргэн шуурхай, чирэгдэлгүй зохион байгуулахад оршино.
Гэрийн хаягаар хүргэх үйлчилгээ нь иргэдийн санаачлагаар гарсан бөгөөд тус төвөөр үйлчилгээ авахаар ирсан 150 иргэнээс “Таны захиалсан жолооны үнэмлэхийг шуудангийн байгууллагаар хүлээн авахыг хүссэн хаягаар хүргүүлэх үйлчилгээг дэмжиж байна уу?” гэсэн асуултан 107 иргэн буюу 71.3 хувь нь дэмжсэн хариу өгсөн байна. 
“Монгол шуудан” ХК-тай гэрээ байгуулснаар иргэд хэвлэгдэн гарсан жолооны үнэмлэхээ өөрийн амьдарч, ажиллаж буй хаягаар хүлээн авах бүрэн боломжтойгоос гадна дэлхийн бусад улс орноос олон улсын шуудангаар хүлээн авах боломжтойгоос гадна иргэд төрийн үйлчилгээний ТҮЦ машин, “Төрийн үйлчилгээний нэгдсэн төв”,www.ezasag.mn сайтаар дамжуулан захиалснаар иргэдийн хувьд цаг хугацаа, санхүүгийн хувьд хэмнэлттэй.

ЦАГДААГИЙН ЕРӨНХИЙ ГАЗРЫН
ЛИЦЕНЗИЙН ТӨВ