Тус аймгийн нутаг дэвсгэрт 2016 оны 07 дугаар сарын 10-ны өдрийн 17 цагийн үед дуу цахилгаантай, хүчтэй аадар бороо 40 орчим минут үргэлжлэн орсноос тус аймгийн төв болох Өлгий сумын 4, 6, 9 дүгээр багийн айл өрхүүд үерийн усанд автсан тухай иргэдээс ирсэн мэдээллийн  дагуу тус Цагдаагийн газрын 80 алба хаагчийг түргэн цугларалтаар дуудаж, хөдөлгөөнт эргүүлийн 4 автомашинтайгаар үерт автсан гэр хорооллын 2 км газрыг тойргийн байдлаар 48 цагийн хугацаанд бүслэн хааж, үйлдэгдэж болзошгүй гэмт хэрэг, зөрчлөөс урьдчилан сэргийлэх, иргэдийн эд хөрөнгийн гэмт халдлагаас хамгаалах үүргийг амжилттай гүйцэтгэлээ.

Аймгийн Онцгой байдлын газрын бие бүрэлдэхүүнтэй хамтран үерийн голомтоос иргэд болон тэдний эд хөрөнгийг нүүлгэн гаргах ажлыг зохион байгуулан нүүлгэх үед шаардлагатай техник хэрэгслээр  дэмжлэг үзүүлжээ.

Хамгаалалтын үед орчин үеийн дэвшилтэд техник технологи болох Phantom-4 маркийн нийсдэг камерийг үйл ажиллагаанд ашиглах замаар тухайн газрыг хяналтанд бүрэн авч, аймгийн Онцгой байдлыг комиссыг мэдээ, мэдээллээр хангаж ажилласны үр дүнд нөхцөл байдалд холбогдуулан шуурхай арга хэмжээнүүдийг авч хэрэгжүүлж байсан. Мөн үерийн голомтоос иргэд болон тэдний эд хөрөнгийг нүүлгэх үед нийтийн хэв журам хамгаалах, замын хөдөлгөөний аюулгүй байдлыг хангах, мэргэжлийн байгууллагуудын хэвийн үйл ажиллагаа явуулах нөхцөл боломжоор хангах ажлыг түргэн шуурхай зохион байгуулжээ.

 Үерийн усанд Өлгий сумын 9 дүгээр багийн 178 орчим айл өрх үерийн усанд автсанаас урьдчилсан байдлаар 105 айлын хувийн орон сууц эвдэрч сүйдсэн, 73 айлын хувийн орон сууц эвдэрч, нурах аюултай гэсэн тооцоо судалгаа гарсан бөгөөд үерийн усанд нэрвэгдсэн нийт 640 хүнийг аврах ажлыг аймгийн Онцгой байдлын газартай хамтран шуурхай зохион байгуулж, үерийн үед эзэнгүй байсан 6 айл өрхийн эд хөрөнгийг хамгаалан хүлээлгэн өгөв.

 Анхны тусламж, дэмжлэгийг тус Цагдаагийн газраас санаачлан зохион байгуулж, үерийн усанд нэрвэгдсэн нийт 71 иргэнд сэтгэл санааны болон 461.500 төгрөгний хүнсний тусламж үзүүлэв.