Олон улсын эрх зүйн хөгжлийн байгууллага “IDLO” (Итали улсын Ром хотноо төвтэй Засгийн газар хоорондын байгуулага) нь “Монгол Улс дахь жендерт суурилсан хүчирхийлэлтэй тэмцэхэд Хууль зүйн салбарын ажилтнуудын чадавхийг бэхжүүлэх” төслийг хэрэгжүүлэхээр Хууль зүйн яам, Шүүхийн ерөнхий зөвлөл, Улсын ерөнхий прокурорын газар, Цагдаагийн ерөнхий газар, Тахарын ерөнхий газар болон Шүүхийн шийдвэр гүйцэтгэх ерөнхий газартай  2016 оны 03 дугаар сард хамтран ажиллах “Санамж бичиг” байгуулсан. Төслийн хүрээнд “Хууль сахиулах салбарын гэр бүлийн хүчирхийлэлтэй тэмцэх, урьдчилан сэргийлэх сургагч- багш бэлтгэх сургалт”-ыг 2016 оны 06 дугаар сарын 20-ны өдрөөс 24-ний өдрүүдэд дээрх 5 байгууллага болон Хууль сахиулах их сургууль, Шүүхийн шинжилгээний үндэсний хүрээлэнгийн 33 алба хаагчдад зохион байгууллаа. Сургалтанд урилгаар АНУ-ын “Aequitas” (Эмэгтэйчүүдийн эсрэг хүчирхийллийн  прокуроруудад зориулсан сан) сангийн захирал Женнифер Лонг, Висконсин мужийн Ла Кросс дүүргийн Ерөнхий шүүгч Рамона Гонзалес нар хүрэлцэн ирж, “Гэр бүлийн хүчирхийлэлтэй тэмцэхэд прокурорын хяналт, шүүхээс хэрэг хянан шийдвэрлэх ажиллагаа”-ны талаар хичээл заасан.

Сургагч-багш нар Монгол Улсын хууль тогтоомж, олон улсын туршлага зэргийг судлан, гэр бүлийн хүчирхийлэлтэй тэмцэх, урьдчилан сэргийлэхэд ашиглагдах “Гарын авлага”-ыг боловсруулж, Хууль зүйн салбарын 200 алба хаагчдын дунд 2016 оны 10 дугаар сард сургалт зохион байгуулахаар төлөвлөөд байна.