Цагдаагийн байгууллагын түүхт 95 жилийн ойг угтаж гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах, түүнээс урьдчилан сэргийлэх үйл ажиллагааны бодитой, шуурхай байдлыг хангахад шаардлагатай мэдээ, мэдээллийг богино хугацаанд шуурхай авах боломжийг бүрдүүлэх, нөгөө талаар цагдаагийн байгууллагаас иргэдэд найдвартай, баталгаатай  үйлчилгээг хөнгөн шуурхай үзүлэх зорилгоор бүртгэлийн хэд хэдэн програм хангамжуудыг боловсруулж, эрх бүхий алба, нэгжид хүлээлгэн өглөө. Үүнд:

1. Галт зэвсэг, галт зэвсэгтэй адилтгах хэрэгслийн бүртгэлийн програм хангамж

УИХ-аас 2015 онд “Галт зэвсгийн тухай хууль”-ийг шинэчлэн баталсантай холбогдуулан   Монгол улсын хэмжээнд иргэд, хуулийн этгээдийн өмчлөлд байгаа галт зэвсэг, галт зэвсэгтэй адилтгах хэрэгслийн шинэчилсэн сан бүрдүүлэх,  зорилгоор “Галт зэвсэг, галт зэвсэгтэй адилтгах хэрэгслийн бүртгэл”-ийн програм боловсруулж, цагдаагийн байгууллагын үйл ажиллагаанд амжилттай нэвтрүүлээд байна.

Тус програм хангамжийг нэвтрүүлснээр иргэд, хуулийн этгээд өөрийн эзэмшлийн галт зэвсгийг бусдад шилжүүлэхэд олон шат дамжлага дамжих шаардлагагүй, галт зэвсэгтэй холбогдолтой аливаа зөвшөөрлийг интернэтээр хүсэх боломжтой зэрэг олон давуу талуудыг бий болгож байгаагаас гадна цагдаагийн байгууллагаас иргэд, хуулийн этгээдийн өмчлөлд байгаа галт зэвсэг, галт зэвсэгтэй адилтгах хэрэгслийн бүртгэл, хөдөлгөөнд тавих хяналт сайжирч, нэгдсэн мэдээллээр хангагдах нөхцөл бүрдэж байна.  

Галт зэвсэг эзэмших, өмчлөх эрх бүхий иргэн, аж ахуйн нэгж, байгууллагаас gun.police.gov.mn цахим хаягт хандан мэдээллээ оруулснаар олон шат дамжлага дамжихгүйгээр нэг цэгээс, эрх шилжүүлэх, зөвшөөрөл авах бүхий л үйлчилгээг болон  холбогдох мэдээллийг цаг тухайд нь авах боломжтой юм.

1. Тэсэрч дэлбэрэх бодис, тэсэлгээний хэрэгслийн эргэлтийн бүртгэлийн програм хангамж           

“Тэсэрч дэлбэрэх бодис, тэсэлгээний хэрэгслийн эргэлтэд хяналт тавих тухай Монгол Улсын хууль”-д “Тэсэрч дэлбэрэх бодис, тэсэлгээний хэрэгслийг зөвшөөрөгдсөн чиглэлийн дагуу тээврийн стандартыг баримтлан тусгай тоноглосон тээврийн хэрэгслээр аюулгүй байдлыг хангаж, харуул хамгаалалттай тээвэрлэх бөгөөд тээврийн хэрэгслийн зөвшөөрөл, 

тээвэрлэлтийн маршрут, харуул хамгаалалтыг цагдаагийн байгууллага олгож, аюулгүй байдалд хяналт тавина.” Гэж хуульчилсан.

Энэ хүрээнд Эрх бүхий төрийн захиргааны байгууллага /яам/-аас тэсэлгээний ажил гүйцэтгэх, тэсэрч дэлбэрэх бодис, тэсэлгээний хэрэгслийг үйлдвэрлэх, импортлох, экспортлох, худалдах, тэсэлгээний ажил, үйлчилгээ үзүүлэх тусгай зөвшөөрлийг хуульд заасны дагуу авсан аж ахуйн нэгж, байгууллагад тээврийн хэрэгслийн зөвшөөрөл, тээвэрлэлтийн маршрут олгох үйл ажиллагааг хөнгөвчлөх, олон шат дамжлагыг багасгаж, төрийн үйлчилгээг иргэдэд хүртээмжтэй хүргэх,  нөгөө талаар тэсэрч дэлбэрэх бодис, тэсэлгээний хэрэгслийн нэгдсэн мэдээллийн сан бүрдүүлэх, тухайн бодисын эргэлтэд болон тухайн үйл ажиллагааг эрхлэгч байгууллагуудын үйл ажиллагаанд болон аюулгүй байдалд хяналт тавих зорилгоор “Тэсэрч дэлбэрэх бодис, тэсэлгээний хэрэгслийн эргэлтийн бүртгэлийн програм хангамж”-ийг боловсруулж нэвтрүүлээд байна.

Эрх хуулийн этгээд тус програмд eis.police.gov.mn цахим хаягаар хандаж, өөрийн нэгжийн тухай мэдээллийг санд бүртгүүлснээр тээврийн хэрэгслийн болон маршрутын зөвшөөрөл авах эрхтэй юм.

1. Гэмт хэргийн цахим зураглал

Тус програм хангамжийг иргэдэд зориулсан буюу тэднийг гэмт хэрэг, зөрчлөөс

урьдчилан сэргийлэх мэдлэг, мэдээллээр хангах зорилго бүхий интернетийн орчинд цахим газрын зураг /Google map/ ашиглан  Эрүүгийн хуулийн тусгай ангийн хүнийг санаатай алах, бусдыг амиа хорлоход хүргэх, бусдын бие махбодид гэмтэл учруулах, танхайрах, дээрэмдэх, булаах, хулгайлах, хүчиндэх гэмт хэрэг хамгийн түгээмэл үйлдэгдэж байгаа 8 төрлийн гэмт хэргийн мэдээллийг тухайн гэмт хэрэг үйлдэгдсэн газар зүйн байршил /уртраг, өргөрөг/-д дүрсээр тэмдэглэж, харуулах  байдлаар 2013 онд боловсруулж, www.crimemap.police.gov.mn цахим хаяг дээр байршуулсан.

Энэхүү програмын хүрээг өргөтгөн сайжруулалт хийж,  цагдаагийн байгууллагаас гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах бодлого тодорхойлох, хүч, хэрэгслийг оновчтой хуваарилах боломжийг олгох зорилгоор ESRI компанийн ArcGIS системд тулгуурлан орон зайн мэдээллийн сан бүрдүүлж ашигладаг төрийн байгууллагуудтай хамтран ажилласнаар Монгол улсын суурь газрын зургийг өдөр, шөнө, хиймэл дагуулын зургийн хувилбартайгаар мэдээллийн сан бүрдүүлж, гэмт хэргийн мэдээллийг эрүүгийн хуулийн зүйл, гэмт хэргийн ангилал, үйлдэгдсэн цаг хугацаа /гараг, цаг/, хэргийн үйлдэл, зохион байгуулалт болон гэм буруугийн хэлбэр зэргээр ангилан харах боломжтой байдлаар боловсруулж, 2016 оны 04 дүгээр сард Гэмт хэрэгтэй тэмцэх албанд хүлээлгэн өгөөд байна.