Цагдаагийн ерөнхий газрын Олон нийтийн аюулгүй байдлыг хангах албаны Хамгаалалтын нэгдүгээр газраас цэргийн алба хаасны тэтгэвэрт гарч байгаа алба хаагчдад хүндэтгэл үзүүлэх ёслол 2016 оны 04 дүгээр сарын 15-ны өдрийн 09.30 цагт мөн газрын жагсаалын талбайд зохион байгуулсан юм.
2016 онд цагдаагийн байгууллагын түүхт 95 жилийн ой тохиож байгаа онцлог жил бөгөөд Цагдаагийн төв байгууллагын удирдлагаас гавьяаныхаа амралтад гарч байгаа алба хаагч нараа хүндэтгэж, ёслол төгөлдөр үдэн гаргах төдийгүй тэдэндээ бүх талаар дэмжлэг, туслалцаа үзүүлэхийг зорьж байгаа билээ.

Энэ үйл ажиллагаанд Цагдаагийн ерөнхий газрын дэд дарга, дэд комиссар Ц.Ням-Очир, Олон нийтийн аюулгүй байдлыг хангах албаны дарга, туслах комиссар П.Энхтогтох болон Хамгаалалтын нэгдүгээр газрын удирдлага, бие бүрэлдэхүүн, цэргийн байнгын тэтгэвэрт гарч буй алба хаагчдын ар гэрийнхэн оролцлоо.

Цагдаагийн ерөнхий газрын Олон нийтийн аюулгүй байдлыг хангах албаны Хамгаалалтын нэгдүгээр газрын дарга, цагдаагийн хурандаа Б.Эрдэнэном хэлсэн үгэндээ “... Өнөөдөр цэргийн алба хаасны тэтгэвэрт гарч байгаа алба хаагчид та бүхэн Монгол төрийн цагдаагийн байгууллагад олон жил идэвх зүтгэл, үр бүтээлтэй ажиллаж, төр, ард түмнийхээ амгалан тайван байдлыг сахиулах үйлсэд эрдэм мэдлэг, хүч хөдөлмөрөө зориулсан, хүндэтгэл хүлээх гавьяатай хүмүүс” гэдгийг онцлон тэмдэглэж, Цагдаагийн ерөнхий газрын дарга, удирдлагуудын мэндчилгээг уламжлан, цаашдын ажил, амьдралд нь аз жаргал, сайн сайхан бүхнийг хүсэн ерөөв.
Энэ үеэр Хамгаалалтын нэгдүгээр газрын алба хаагчдын зэвсэгтэй жагсаалын үзүүлэх тоглолтыг сонирхуулж, цагдаагийн дэслэгч Б.Энхболд, цагдаагийн ахлах ахлагч Э.Энхбаатар, Б.Мөнгөнчимэг нар “Монгол төрийн цагдаа” дуугаар мэндчилгээ дэвшүүлж, цэргийн алба хаасны тэтгэвэрт гарч буй алба хаагчдыг Цагдаагийн ерөнхий газрын даргын тушаалаар “Монгол цагдаа” тэмдгээр шагнаж, дурсамж хадгалуулан, бэлэг, дурсгалын зүйлс гардууллаа.