“ЗУУНЫ МЭДЭЭ" СОНИНЫ СЭТГҮҮЛЧ Б.ЭНХЗАЯА ЯРИЛЦЛАА

Цагдаагийн хурандаа Д.Бадамрагчаа: Увсад малын хулгайн гэмт хэргийн гаралт буурсан

Цагдаагийн байгууллагын удирдах ажилтны зөвлөгөөн энэ өдрүүдэд үргэлжилж байна. Энэ үеэр Увс аймгийн Цагдаагийн газрын дарга, хурандаа Д.Бадамрагчаагаас тус аймаг дахь эрүүгийн нөхцөл байдлын талаар тодрууллаа.

-Увс аймгийн хувьд эрүүгийн нөхцөл байдал ямар байдаг вэ. Танайх хил дамнасан малын хулгай гарах эрсдэлтэй байх аа?

-Малын хулгайн гэмт хэргийн хувьд 2012 оноос хойш тогтмол бууж байгаа. 2012 онд 80 орчим хэрэг гарч байсан бол өнгөрсөн онд 50 хэрэг гарсан. 1990-ээд онтой харьцуулахад хил орчим тайван болсон. Тэр үед зэвсэглэсэн этгээдүүд хил зөрчиж дээрэм, хулгай хийдэг байсан бол одоо үгүй болсон зогссон. Энэ нь төр засаг, хилийн болон цагдаагийн байгууллагаас хэрэгжүүлсэн ажлын үр дүн. Бидний зүгээс малын хулгайн гэмт хэргээс урьдчилсан сэргийлэх ажилд онцгой анхаарч иргэдийн хамтын ажиллагааг бий болгосон. Тухайлбал, малчдын бүлэг, нөхөрлөл байгуулж, малын хариулгатай болсон. Мөн хил орчмын улсын мэргэжил нэгт хүмүүстэй маш сайн харилцаатай байгаа. Ингэснээр гэмт хэргийг шуурхай илрүүлж, таслан зогсоох бүрэн боломжтой. Энэ тухай нутгийн иргэд ч мэддэг болсон.  Харин бусдын эрх чөлөө, эрүүл мэндийн эсрэг гэмт хэрэг буурахгүй байгаа.

-Энэ удаагийн зөвлөгөөнөөр та бүхэн ЦЕГ-ын даргатай үр дүнгийн гэрээ байгуулна. Энэ онд та бүхэн ямар ажил хийхээр төлөвлөж байна?

-Аймгийн төвийг камержуулах ажлыг хийхээр төлөвлөсөн. Улс эдийн засгийн хүнд нөхцөлд байгаа ч гэсэн төсвөөс камержуулалтын тоног төхөөрөмж худалдан авахад зориулж 360 сая төгрөг төсөвлөсөн. Аймгийн хэмжээнд 72 камерийг суурилуулах юм. Ингэснээр гэмт хэргээс урьдчилан сэргийлэх томоохон ажил болно. Мэдээж иргэдтэй хамтардаг, харилцдаг, тэднийг гэмт хэргээс урьдчилан сэргийлэхэд чиглэсэн үйл ажиллагаагаа үргэлжлүүлэн хэрэгжүүлнэ.

Бас Хяргас нуурын дэргэд цагдаагийн пост байгуулах ажлыг төлөвлөөд байна. Хяргас нуур Ховд, Баян-Өлгий болон манай аймгийн ард иргэдийн дайран өнгөрдөг газар. Баяр ёслолын үеэр тэнд 400-500 машин цуглардаг. Тиймээс тэнд яалт ч үгүй цагдаагийн пост байгуулах шаардлагатай байгаа юм. Эдгээр ажлыг хийж гүйцэтгэнэ.

-Цагдаагийн албан хаагчдын нийгмийн асуудал хэр байгаа вэ?

-Манай байгууллага залуу боловсон хүчин олонтой. Тэд ажлын төлөө гэсэн сэтгэлтэй залуус. Албан хаагчдын ажиллах, өөрийгөө хөгжүүлэх орчныг бүрдүүлсэн. Мөн тэд дундын сантай. Түүгээр дамжуулж нийгмийн асуудлаа шийддэг.

-Увс аймгийн харъяат, бизнес эрхэлдэг эмэгтэй Тувад амиа алдсан хэрэг гарсан. Энэ хэрэг хэрхэн шийдвэрлэгдсэн бэ?

-Хэргийг ОХУ-ын Тува улс дахь Дотоод явдлын яамны ажилтнууд шалгаж байгаа. Одоогоор харамсалтай нь тогтоогдсон зүйл алга. Бид байнгын холбоотой, мэдээлэл солилцоод ажиллаж байгаа.