Аймгийн Засаг даргын тамгын газраас тус аймгийн төрийн байгууллагуудын 2015 онд хэрэгжүүлсэн ажлыг үнэлж дүгнэсэн ба Увс аймаг дахь Цагдаагийн газар 2 дугаар байрт шалгарч батламж 800 000 төгрөгөөр шагнууллаа.

            Увс аймгийн цагдаагийн газар нь 2015 онд     тус аймгийн нутаг дэвсгэрт бүртгэгдсэн нийт гэмт хэргийн 74.4 хувийг илрүүлэн гэмт хэргийн илрүүлэлтийн түвшингээ ахиулж ажиллажээ.

            Аймаг байгуулагдсаны 90 жилийн ой “Увс-Их хурд” баруун бүсийн хурдан морины уралдаан, Монгол бөхийн баяр наадмын хэв журмын хамгаалалтыг гэмт хэрэг, зөрчилгүй өндөр түвшинд зохион байгуулж ажилласан. 

            Түгээмэл үйлдэгддэг мал хулгайлах гэмт хэргээс урьдчилан сэргийлэх, илрүүлэх, таслан зогсоох чиглэлээр “Морьт эргүүл” арга хэмжээг хавар, намрын улиралд иргэд малчдын хүч оролцоотойгоор үр дүнтэй зохион байгуулж, мал хулгайлах гэмт хэргийн тоог сүүлийн гурван  жил дараалан бууруулсан юм.

            Урьд онуудад үйлдэгдээд яллагдагчаар татагдвал зохих этгээд нь тогтоогдоогүй үндэслэлээр түдгэлзүүлсэн хэрэг 27.5 хувиар буурч, аймгийн төвд үйлдэгдсэн гэмт хэрэг 12 хэргээр буюу 6,2 хувиар буурчээ.

     Шүүхээс ял тэнсэгдсэн болон хорих байгууллагаас хугацааны өмнө тэнсэн суллагдсан этгээдүүдэд тавих захиргааны хяналтыг үр дүнтэй зохион байгуулж, дахин гэмт хэрэг үйлдсэн хоёр , хяналтад байх хугацаандаа захиргааны арга хэмжээ авагдсан  дөрвөн этгээдийн хорих ялыг биечлэн эдлүүлэх санал гарган шүүхээр шийдвэрлүүлэн, хорихоос өөр төрлийн ялтай бусад иргэдийг дахин гэмт хэрэг үйлдэхээс урьдчилан сэргийлж ажиллажээ.

            Мөн аймгийн хэмжээнд үйлдэгдсэн хүнд, онц хүнд гэмт хэргийг 100% илрүүлж, шийдвэрлэсэн байна. Цагдаагийн газарт ирсэн гомдол, мэдээлэл нэг бүрийг ирсэн өдөр, цаг, минутаар нь Улаангом сумын план зураг дээр тэмдэглэж баг хариуцсан хэсгийн байцаагч, багийн цагдаа нарыг тухайн гэмт хэрэг, зөрчил гарсан газар болон айл өрхөөр зочлуулж гэмт хэрэг зөрчил дахин гаргуулахгүй байх талаар нэгдсэн, тусгай арга хэмжээ зохион ажилласан.

            Мөн эрүү болон хэв журмын нөхцөл байдлын статистик мэдээг үндэслэж гэмт хэрэг, захиргааны зөрчил гарахаас урьдчилан сэргийлэх, таслан зогсоох зорилгоор цагдаагийн газрын аймгийн төвд ажилладаг 62 алба хаагчдыг ажлын 4 хэсэгт хувааж тасгийн дарга нараар ахлуулан үүрэг гүйцэтгэх чиглэлийг  зааж өгч сард 1 удаа 3-4 цаг эргүүлийн үүрэг гүйцэтгүүлж хэвшсэн.

            Гэмт хэрэг, зөрчлийн гаралт болон цаг үеийн нөхцөл байдалтай уялдуулан Эрүүгийн цагдаагийн тасгийн тасгийн алба хаагчдыг багийн цагдаа болон эргүүлийн алба хаагчидтай шөнийн эргүүлд томилон 00-07 цагийн хооронд ажилуулдаг байна.

            Аймгийн удирдлага холбогдох байгууллагад санал хүргүүлэн аймгийн төв гудамжны гэрэлтүүлгийг сайжруулснаар дээрэм, булаалтын гэмт хэрэг бүргэгдээгүй иргэд аюулгүй амар тайван ажиллаж амьдрах нөхцөл бүрдсэн зэрэг ажлуудыг хэрэгжүүлэн ажиллажээ.