ӨНӨӨДРИЙН ОНЦЛОХ АЛБА ХААГЧ

НАЛАЙХ ДҮҮРГИЙН ЦАГДААГИЙН ХЭЛТСИЙН ХЭВ ЖУРМЫН ОФИЦЕР, ЦАГДААГИЙН АХМАД О.БОЛДБААТАР: БИ ХЭЛТЭСТЭЭ 20 ДАХЬ ЖИЛДЭЭ АЖИЛЛАЖ БАЙНА

Налайх дүүргийн цагдаагийн хэлтсийн бие бүрэлдэхүүн хэмээх их өнөр айлд үүрэг гүйцэтгэж, түмэн олныхоо төлөө нэр төртэй зүтгэдэг үе үеийн олон алба хаагч нар байдаг. Энгийн ажилтнаас эргүүлийн цагдаа болж хэлтэстээ хорин жил тууштай ажилласаар, хэв журмын ахлах офицер цагдаагийн ахмад болтлоо өсөж дэвшин, хамт олондоо үлгэр дууриал болсон цагдаагийн ахмад О.Болдбаатартай уулзлаа.

Хүүхэд байхаасаа мөрөөдсөн албандаа ахмад цолтой ахлах болтлоо ажиллаж, таван хүүхдийн аав, хэлтсийнхээ тэргүүний алба хаагч, нийслэлийн шилдэг гэр бүл, шилдэг аж ахуйч гэр бүлээр шалгарсан гээд хамт олондоо үлгэр дууриал болсон нэгэн. Гэрт нь очиход хашаа дүүрэн цэцэг, тэхийн шээг, үхрийн нүд гээд олон төрлийн жимс жимсгэнэ тарьж ургуулан, цаг заваараа амьдрах орчноо үргэлж тохижуулж, сайжруулан ажил амьдралаа хослуулдаг сайхан гэр бүлийн эзэн.
Цагдаагийн байгууллагын цаг завгүй их ажлынхаа хажуугаар үр хүүхдээ өсгөж хүмүүжүүлэн, амьдрал ахуйгаа тэгшхэн авч яваа сайхан аавуудын нэг цагдаагийн ахмад Болдбаатар ээлжийн амралтаа гол төлөв хаврын улиралд авч, жимс ногоогоо тарьж, зуны урт өдрүүдэд ажлаа тарж ирээд арчилж тордон, намрын налгар өдрүүдэд найз нөхөд, үр хүүхдүүдээ жимс жимсгэнээр дайлж цайлан амьдардаг юм байна.

Эргүүлийн цагдаагаас ажиллаж байсан үеэсээ эхлээд өдгөө хүртэл архи ууж агсан тавьсан, элдэв хэрэг зөрчил гаргасан олон хүмүүстэй нүүр тулдаг онцлогтой ч энэ бүхэнд зөөлөн нь хатуугаа гэсэн нэг л зарчмыг гол болгон хууль дүрмийн дагуу шийдвэрлэж иржээ. Агсан тавьсан, уурлаж бухимдсан, зодоон цохионтой газар очоод улам уурлаж бухимдаснаас аль болох нөхцөл байдлыг тайван болгохын төлөө явсаар хорин жил ард хоцорчээ. Та намайг архи уугаад хүн алахаас, гал гаргахаас, зодоон цохион үүсгэхээс аварсан гэж хожим нь баярлаж талархдаг хүмүүс олон байдаг шүү гэж инээмсэглэн ярьж суух О.Болдбаатар ахмад хамт олныхоо дунд ч ажилсаг хичээнгүй үргэлж инээмсэглэж явдаг ч албандаа үнэнч сайхан хүн шүү гэж хайрлан хүндлэгдэж иржээ.
Ажил амьдралаа хослуулан ард иргэдийнхээ амар амгаланг сахиулах үйлсдээ нэрт төртэй зүтгэдэг олон алба хаагч нарын нэг цагдаагийн ахмад О.Болдбаатартаа ажлын амжилт хүсье