ОНЦЛОХ СУРВАЛЖЛАГА

НАЛАЙХ ХОТЫН ЦАГДААГИЙН ХЭЛТСИЙН 80-Н ЖИЛИЙН ОЙ ТОХИОЖ БАЙНА

Онцлох сурвалжилгаараа бид Налайх дүүргийн цагдаагийн хэлтсийн нэг өдрийн ажил амьдралыг хүргэж байна. 1930-аад оны эхээр орон нутгийн засаг захиргааны хуваарь шинэчлэгдэж зарим аймгуудад Цагдан сэргийлэх анги байгуулагдаж эхлэсэн түүхтэй. Налайхын нүүрсний үйлдвэрийн дэргэд 1935 онд Цагдан сэргийлэх харуулын пост нэртэй байгуулагдснаар тус хэлтсийн суурь тавигдаж, өдгөө 80-н жилийн ойтойгоо золгож байна. Байгуулсан гавьяатай, туулсан замналтай, үе үеийн бахархан дууриах ахмад буурлуудтай, цагдаагийн байгууллагын эрх зүйн шинэчлэл ид өрнөж байгаа өнөө цаг үед олон арван чадварлаг алба хаагчидтай ард иргэдийнхээ амар амгалан амьдралын төлөө зүтгэдэг.
Тус хэлтэс нь 1952 онд Налайхын цагдан сэргийлэх 5-р анги, 1985 онд цагдан сэргийлэх 6-р анги, 1964 онд Цагдан сэргийлэх хэлтэс, 1990 онд Налайх дүүргийн цагдаагийн хэлтэс, 1997 оноос Налайх дүүргийн Засаг даргын дэргэдэх Цагдаагийн хэлтэс болгон өргөтгөн үйл ажиллагаагаа явуулж байгаад Цагдаагийн Ерөнхий газрын даргын 2015 оны 05-р сарын 21 ний өдрийн тушаалаар Налайх дүүрэг дэх цагдаагийн хэлтэс нэртэйгээр ажиллаж байгаа юм.
Налайх нь Улаанбаатар хотын 9 дүүргийн нэг. 68,7 мянган га нутагтай, 8992 өрхөд 32,513 хүн амтай, засаг захиргааны 7 хороотой нийслэл хоттой авто болон төмөр замаар холбогдсон томоохон дүүрэг. Налайх дүүргийн цагдаагийн хэлтсээс гэмт хэргээс урьдчилан сэргийлэх чиглэлээр үндсэн үүргийн хүрээнд тус дүүргийн нутаг дэвсгэрт “Олон нийт цагдаагийн хамтын ажиллагаа хөтөлбөр, “”Гэр бүлийн хүчирхийлэлтэй тэмцэх хөтөлбөр”, “Хөршийн хяналт холбоо хөтөлбөр”, “Гэмт хэргээс урьдчилан сэргийлэх мэдээлэл, сурталчилгааны хөтөлбөр” зэрэг хөтөлбөрүүдийг үр дүнтэй хэрэгжүүлэн ажиллаж байна.
Зүүн аймгууд болон аялал жуулчлалын гол бүс болсон Тэрэлж, Цонжин болдог цогцолборыг зоригсод дамжин өнгөрдөг нутаг. Жилийн дөрвөн улиралд дээрх чиглэлүүдээр зорчиж байгаа аялагчид, зорчигчид авто машины цуваа тасардаггүй хөл хөдөлгөөн ихтэй юм. Налайх дүүргийн цагдаагийн хэлтсийн Замын цагдаагийн тасгаас улирал бүрийн онцлогт тохирсон нэгдсэн арга хэмжээг зохион байгуулж, хуулийн дагуу жолооч зорчигчдын аюулгүй байдлыг ханган ажилладаг юм. Намрын улирал эхлэсэнтэй холбогдуулан замын хөдөлгөөний аюулгүй байдлын шинэ хуулийн хэрэгжилтийг хангахаас гадна хориотой мал мах, түүхий эд тээвэрлэх, зөөвөрлөх, орон нутгийн замд хурд хэтрүүлэх, архи согтууруулах ундаа хэрэглэсэн жолоочииг саатуулах зэрэг олон чиглэлээр хяналт тавин ажилладаг юм.
Цагдаагийн газар хэлтсүүдийн хамгийн их анхаарал татсан асуудал бол алба хаагчдын нийгмийн асуудал байдаг. Энэ ажлын хүрээнд Налайх дүүргийн цагдаагийн хэлтсийн алба хаагчдын 35 айлын орон сууцыг барьж, ашиглалтанд оруулан, дүүргийн 5-р хорооны нутаг дэвсгэрт 76-н алба хаагчийн зуслангийн газар олгуулж, бялдаржуулах танхимыг бүрэн тохижуулан, ахлагч нарын болон нийтийн цагдаагийн хувцас хэрэгсэл хадгалах өрөөг байгуулсанд алба хаагчид баяртай байна. Мөн хууль тогтоомжийн дагуу дэмжлэг үзүүлэх ажлын хүрээнд 100 гаруй алба хаагч нарт мөнгөн тусламж үзүүлэн, орон сууцны урт хугацаатай хөнгөлттэй зээлд хамрагдах хүсэлт гаргасан алба хаагч нарын асуудлыг шийдвэрлэж өгчээ.
Налайх дүүргийн цагдаагийн хэлтсийн ахмадын хороо гавьяаныхаа амралтанд гарсан олон арван алба хаагчдаараа бахархаж тэднийг олон нийтийн үйл ажиллагаанд татан оролцуулах, нийгмийн асуудлыг шийдвэрлэх, бие бүрэлдэхүүний залгамж халааг сайжруулахад анхаарч ажиллаж байна. Наян жилийн түүхийн хуудсыг бичилцэж ирсэн, цөөнгүй ахмадууд одоо ч хүртэл Налайх дүүрэгтээ аж төрж, ажлын туршлагаа харамгүй хуваалцаж, амжилт ололт, алдаа оноогоо дүгнэн хуучилж суудагаа.
Тус хэлтсийн алба хаагчид олон сайхан шинэлэг ажлуудыг санаачилан ард иргэдийнхээ талархлыг хүлээдэг. Урин дулааны улиралд хотынхоо төв хэсэгт оройн 18-н цагаас эхлэн 22 цаг хүртэл замын хөдөлгөөнийг түр хааж, иргэдийн тайван алхах, хүүхэд багачуудын тоглох, чөлөөт цагаа зөв боловсон өнгөрүүлэх боломжийг бүрдүүлсэнд иргэд баяртай байна. Мөн энэ үеэр олон нийтийн цагдаа, эргүүлийн цагдаа ажиллаж, иргэдийн амар тайвныг сахиулах үйл ажиллагаанд хяналт тавьж, хууль эрх зүйн зөвлөгөө тусламж дэмжлэг үзүүлэн ажилладаг.
Өнөөдрийн онцлох сурвалжлагаараа бид Налайх дүүргийн цагдаагийн хэлтсийн нэг өдрийн үйл ажиллагаа, нутаг дэвсгэрийн онцлог, алба хаагчдын аж амьдралыг онцлон хүргэлээ. Нийслэл хотын томоохон дүүргүүдийн нэг Налайх дүүргийн цагдаагийн алба хаагч нарынхаа ард иргэдийнхээ амар амгаланг сахиулах их ажилд нь амжилт хүсье.
Б.Төгсжаргал