ӨНӨӨДРИЙН СЭРЭМЖЛҮҮЛЭГ

Урин дулааны улирал хэдийнээ эхлэж, барилга бүтээн байгуулалтын ажил ид өрнөж байна. Үүнтэй холбоотойгоор хөдөлмөрийн аюулгүй ажиллагааны дүрэм журмыг баримтлан ажиллагаагүйгээс иргэн гэмтсэн тохиолдол цагдаагийн байгууллагад бүртгэгдсэн юм.

Баянгол дүүргийн цагдаагийн хоёрдугаар хэлтсийн нутаг дэвсгэрт "Хүний толгой дээр төмөр уналаа" гэсэн мэдээлэл ирсний дагуу шалгахад, барилгын ажил гүйцэтгэж байсан иргэн Н-ийн дээрээс 3 метрийн урттай төмөр труба унаж гэмтээжээ. Мөн Хан-Уул дүүргийн цагдаагийн 1-р хэлтсийн нутаг дэвсгэрт "Өндрөөс унасан хүн ирлээ" гэсэн мэдээлэл цагдаагийн байгууллагад ирснийг шалгахад барилгын пасадны ажил хийж байсан иргэн М унаж гэмтэж эмчлүүлж байна. Мөн "Баянзүрх захын урд талын барилга дээрээс унаж гэмтсэн байна" гэсэн мэдээллийг шалгахад барилгын туслах ажилтан иргэн Э 3-р давхарын шатан дээр хий гишгэж унаж гэмтснийг Баянзүрх дүүргийн цагдаагийн гуравдугаар хэлтэст тус тус шалгаж байгаа юм.
Иймээс иргэд та бүхэн барилга байшингийн засвар үйлчилгээ, бүтээн байгуулалтын ажил гүйцэтгэхдээ хөдөлмөрийн аюулгүй ажиллагааг хангаж, дүрэм журмын дагуу ажиллахыг цагдаагийн байгууллагаас ӨНӨӨДРИЙН СЭРЭМЖЛҮҮЛЭГ-ээрээ онцлож байна.