Миний нөхөр намайг зодоод, үргэлж дарамтлаад байна гээд зүс нь танигдахгүй шахам болсон бүсгүйчүүд өргөдөл бариад цагдаад ханддаг. Цагдаа шалгаж эхлээд байж байтал одоо дахиж зодохгүй гэсэн өргөдлөө авья гээд өрөвдөлтэй царай үзүүлээд буцаад гуйна. Сарын дараа дахиад ирнэ. Жилд дор хаяж гурав ирнэ. Цаадах нь АХИАД УУЧЛААЧ гэж хэлсэн бололтой.

АХИАД УУЧЛААЧ...ЗА

Ийм л байдлаар явсаар гэр бүлийн хүмүүжил, эрүүл мэнд, амьдралын аз жаргал, инээд хөөрийг мэдэхгүй насыг барсан олон гэр бүл байна. Согтуугаар үйлдэгдсэн гэмт хэргийн гаралт буурахгүй байгаа нь нэг үгээр хэлбэл гэртээ архи ууж сагсан тавьдаг үр хүүхдээ байнгын дарамтанд байлгадаг хүмүүсийн тоо бас буурахгүй байна гэсэн үг.
Булган аймгийн Орхон суманд энэ оны 05-14ний согтуудаа бага насны хоёр хүүхдийнхээ аминд хүрсэн эцэгт шүүхээс 25-н жилийн ял оноосон ч эхнэр нь гомдолгүй ээ гээд уйлаад зогсож байх жишээтэй. Энэ бүсгүй өмнө нь мөн АХИАД УУЧЛААЧ.. гэхэд нь ЗА гэж хэлээд л ийм байдалд хүрсэн байдаг.
Хотод бол хандах газар олон. Хүчирхийллийн эсрэг Үндэсний төв, Цагдаагийн байгууллагын гэр бүл хүүхдийг хамгаалах байр, бусад төрийн бус байгууллагууд. Адаглаад л аль нэг хамаатныхаа хаалгыг тогшино. Хөдөө бол энэ асуудал бүр хүнд байгаа тухай цөөнгүй хэргийг дурьдаж болно. Гэрээсээ гараад гүйхэд морь мотоциклоороо гүйцээд ирэх хүнийг яахав. Хүн хүнээ араатнаас дор айлгаж сүрдүүлж, зодож танхайрах байдал дэндэж байгаа тухай Ерөнхийлөгчөөсөө эхлээд иргэн бүр л ярьж, хэвлэл мэлээллийн байгууллагаар их л бичигдсэн.
Жирийн сайхан ажлаа хийгээд, малаа хариулаад, архи дарсны зохистой хэрэглээг эрхэмлээд явбал дайн самуунгүй тайван эх орондоо бие биенээ гэсэн сэтгэлээр хандаад амьдарвал болохгүй юм үгүй санагдна.
АХИАД УУЧЛААЧ гэвэл ЗА гэхүү. Яах вэ?