Архи, согтууруулах ундааг хэтрүүлэн хэрэглэх нь хариуцлага хүлээх хамгийн эхний алхамаа хийж байгаа хэрэг юм.

Хүн бүр эрүүл энх, элэг бүтэн, аз жаргалтай амьдрахыг хүсдэг. Согтууруулах ундааг хэтрүүлэн хэрэглэвэл хүн орчин тойрноо үнэлэх, биеэ удирдах чадвар сулардаг байна. Энэ үедээ хүн өөрийгөө юу хийж байгааг ч мөн хянах чадваргүй болдог аж.

Архинд донтох эмгэг тодорхой үе шаттай байдаг байна. Үүний хамгийн эхний үе шат бол архийг хэтрүүлэн хэрэглэх явдал юм.

Аз жаргалтай, амар тайван амьдрал таниас эхлэлтэй. Үр хүүхдийнхээ дэргэд баяр ёслол, найр наадам, тэмдэглэлт ойн үеэр архи, согтууруулах ундааг хэтрүүлэн хэрэглэхгүй байх нь үр хүүхэд, хүрээлэн буй орчны хүмүүсдээ үзүүлж буй хамгийн том үлгэр дууриалал юм.

Энэ оны эхний улирлын байдлаар бүртгэгдсэн нийт гэмт хэргийн 1355 нь согтууруулах ундаа хэрэглэсэн үед үйлдэгдсэн байна. Нэгэн жишээ дурдвал иргэн А нь согтууруулах ундаа хэрэглэсэн үедээ гэртээ харихаар явж байгаад иргэн Х-тэй маргалдан хоорондоо зодолджээ. Иргэн Х-г хоёроос гурван удаа цохих үед газарт унаж тархинд нь цус харван газар дээрээ нас барсан байна. Ингэснээр хүний амь насыг хохироосон харамсалтай хэрэг гарсан байна.

Улсынхаа ирээдүй болсон залуу хүн бүр хариуцлагатай, ухамсартай байж эрсдэл бүрийг ухаалгаар шийдвэрлэх хэрэгтэй.

Согтууруулах ундааг хэрэглэснээр гэмт хэрэг, зөрчил үйлдээд зогсохгүй эрүүл мэнд, эд зүйлс, хайртай бүхнээ ч алдах харамсалтай явдал гардаг байна.

Архи, согтууруулах ундааг хэтрүүлэн хэрэглэх нь зүрх, элэг, нойр булчирхай, ходоодны төрөл бүрийн өвчин, хавдар үүсэх шалтгаан болж байгаа юм. Эрүүл, аз жаргалтай амьдрахыг хүсдэг хүн бүр согтууруулах ундаанаас татгалзах нь зүйтэй.

Гэр бүл, үүрэгт ажилдаа цаг зав гарган, аюулгүй, айдасгүй, эрсдэлгүй, амар тайван амьдралыг бий болгоё! Хүний эрүүл мэнд, амь нас юу юунаас ч үнэ цэнэтэй байдаг гэдгийг ойлгох ухамсартай байх хэрэгтэй.