Мэдээлэл дүн шинжилгээ, шуурхай удирдлагын албаны Мэдээлэл шуурхай удирдлагын төвийн шуурхай удирдлагын 102-н хэлтсийн, мэдээлэл хүлээн авагч, цагдаагийн дэслэгч Нямдэлэгийн Энхнаран нь 2018 онд Монгол улсад зохион байгуулагдсан Ази тивийн аварга шалгаруулах Олон улсын таеквондогийн 9 дахь удаагийн тэмцээнд  тулааны 72кг жинд мөнгөн медаль хүртэж байсан түүхтэйгээр өмнө нь бид нийтэлж байсан. Тэрээр 2005 оноос Олон улсын таеквондогоор хичээллэж эхлэн, спортын мастер, хар бүс нэг дантай тамирчин юм.

Тэрээр Хойд Судан Улсын Дарфур мужид НҮБ-ын мандаттай Энхийг дэмжих ажиллагаанд оролцохоор 2019 оны 05 дугаар сарын 25-ны өдрөөс  UNAMID-ын мандатын дагуу Цагдаагийн зөвлөх гэдэг албан тушаалд үүрэг гүйцэтгэж байна. Олон улсын Эмэгтэйчүүдийн эрхийг хамгаалах өдөр цахимаар холбогдож ярилцлаа.

Манай цагдаагийн байгууллагаас  эмэгтэй алба хаагчид Энхийг сахиулах үйл ажиллагаанд амжилттай оролцож  байгаа нь бид бүхний бахархлыг төрүүлсээр байна. Өнөөдөр та хэрхэн ажиллаж байна? 

Юуны өмнө нийт эмэгтэйчүүддээ олон улсын эмэгтэйчүүдийн  баярын мэндийг алсын Африк тивээс дэвшүүлье. Миний хувьд НҮБ, Африкын холбооны хамтарсан Дарфур дахь энхийг дэмжих ажиллагаанд томилогдож ирээд 9 сар болж байгаа юм.  Судан Улсын Дарфур мужын хойд хэсэгт байрлах Тавилла суурин дах НҮБ-ын баазад ЦЕГ-ын Мэдээлэл шуурхай удирдлагын төвийн програм хангамж хариуцсан инженер, цагдаагийн хошууч Н.Даваажавын хамт UNAMID-ын мандатын дагуу Цагдаагийн зөвлөх гэдэг албан тушаалд үүрэг гүйцэтгэж байна.

Би Хойд Судан улсын нийслэл Хартум хотноо 2019 оны 5 сарын 25-ны ирж UNAMID ажилгааны төв байранд нөхцөл байдалтай танилцаж, бүртгүүлж, тус ажиллагааны албан ёсны оролцогч /цагдаагийн бие даасан зөвлөх/-ийн үнэмлэх авсанаар ерөнхийдөө ажил минь эхэлсэн. Ажилгааны төв штабт Элфаширт ирж ажилгааны үеийн нөхцөл байдал, аюулгүй байдлыг хангаж ажиллах, нутгийн иргэдтэй харилцах арга, тактик, тэдний зан заншил, шашин шүтлэг, соёлын талаар болон ажилгаатай холбоотой өдөр тутмын ажил, ахуйн нөхцөл, эмнэлгийн анхан шатны тусламж үзүүлэх, аливаа өөрт тулгарсан хүндрэлтэй асуудлыг шийдвэрлэх зэрэг зайлшгүй мэдэх сургалтуудад хамрагдсан.

Үүрэг гүйцэтгэж буй газар орны хувьд мөргөлдөөны дараах бүс нутагт тулгардаг хүний, ялангуяа хүүхэд, эмэгтэйчүүдийн эрхийн зөрчил ихтэй, хүч хэргэлсэн гэмт хэргийн тоон үзүүлэлт хүн амтай нь харьцуулж тооцоход харьцангуй өндөр, иргэд нь цагдаа, эмнэлэг, төрийн захиргаа, газрын асуудлыг шийдвэрлүүлэх зэрэг төрийн үйлчилгээнээс харьцангуй хол, хөндий, хүнсний болон цэвэр усны хомсдолын эрсдлийн түвшин өндөр зэрэг асуудлууд шийдвэрлэгдээгүй байна.

Бид UNAMID-ын мандатын дагуу газар тариалангийн бүс, гудамж талбайд дундын болон ойрын зайн эргүүлийн үүрэг гүйцэтгэж иргэд, төрийн ба төрийн бус болон нутгийн захиргааны байгууллагын ажилтан, албан хаагч нартай уулзаж аюулгүй байдлын үнэлгээ хийх, тэдэнд тулгамдаж буй хүний эрх, эрх чөлөө, аюулгүй байдлыг хангахтай холбоотой мэдээлэл цуглуулж төв штаб руугаа дамжуулж ажилладаг. Ажиллах явцдаа НҮБ-ын ажиллагаатай холбоотой гаргасан дүрэм, журмуудыг биелүүлж ажиллаж байгаа бөгөөд одоогоор ажил, амьдрал хэвийн байна.

Тамирчин хүний хувьд энд зохион байгуулагдаж байгаа уралдаан тэмцээнд хэрхэн амжилттай оролцож байна вэ? 

2020 оны 3 сарын 7-ны өдөр Олон улсын эмэгтэйчүүдийн эрхийг хамгаалах өдөрт зориулан Дарфур дахь нийт үүрэг гүйцэтгэж байгаа цагдаа, цэргийн энхийг сахиулачдын дунд зохион байгуулсан 12 км-ын минни марафон тэмцээн амжилттай болж, миний бие алтан медаль, цомоор шагнагдсан амжилт гаргасан мэдээг дуулгахад таатай байна. Медалиа гардан авах тэрхэн агшинд эргэн хараад эх орондоо шагнал гардан аваад хэлдэг ёсоор, өөрийн эрхгүй “Монгол улсынхаа төлөө зүтгэе” гэж хэлсэн. Энэ үед л Монгол улс тэр дундаа цагдаагийн байгууллагын алба хаагч гэдгээрээ өөрийн эрхгүй бахархах сэтгэл төрсөн. Энэ л тамирчин хүн болсоны хамгийн сайхан мэдрэмж юм даа.