Монгол Улсын Засгийн газрын 2019 оны 134 дүгээр тогтоолоор Төвийн бүсийн зуны уралдааныг Говьсүмбэр аймагт, Хангайн бүсийн зуны уралдааныг Хөвсгөл аймагт, Баруун бүсийн зуны уралдааныг Баян-Өлгий аймагт, Зүүн бүсийн зуны уралдааныг Дорнод аймагт, Говийн бүсийн зуны уралдааныг Өмнөговь аймагт, Ламын гэгээн Лувсанданзанжанцангийн мэлмий гийсний 380 жилийн ойн бүсийн уралдааныг Баянхонгор аймагт 2019 оны 7 дугаар сарын 27, 28-ны өдрүүдэд тус тус зохион байгуулахаар тогтоосон.

Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах албанаас Засгийн газраас тогтоосон бүсийн наадмуудад нийтийн хэв журам, олон нийтийн аюулгүй байдлыг хангуулахаар нутаг дэвсгэр хариуцсан цагдаагийн байгууллагуудтай хамтран хэв журмын хамгаалалт, зохицуулалтыг улсын баяр наадмын жишгээр зохион байгуулж, мэргэжил, арга зүйн удирдлагаар ханган ажиллах юм байна.

Иймд иргэд та бүхэнд дараах сэрэмжлүүлгийг хүргүүлж байна.

Улаанбаатар хотоос хөдөө орон нутаг руу зорчих иргэд, тээврийн хэрэгслийн хөдөлгөөн ихсэх, мөн ойрын өдрүүдэд нийт нутгаар усархаг бороо орох тул үер усны аюулаас болгоомжлох, замын хөдөлгөөний аюулгүй байдлыг хангаж, суудлын бүсээ зүүж, хурдаа тохируулж, шөнийн цагт орон нутгийн замд ойрын гэрэлтэй хөдөлгөөнд оролцох;

Олон нийтийн газар болон гол мөрний орчимд бага насны хүүхдийг хараа хяналттай байлгаж, харгалзах хүнгүй явуулахгүй байх;

Архи согтууруулах ундаа хэрэглэсэн үедээ тээврийн хэрэгсэл жолоодохгүй, гол мөрөнд орохгүй байх, сум, орон нутаг, байгууллага хамт олны ойн баярыг тэмдэглэхдээ архи согтууруулах ундааг зөв зохистой хэрэглэж, аливаа болзошгүй эрсдэл, гэмт хэрэг, зөрчилд өртөж, хохирохоос сэргийлэх;

Хэрэглээний газ /баллонтой хий/ халуунд халж дэлбэрэх аюултай тул зөв зохистой аюулгүйн санамжийн дагуу хэрэглэх.

Олон нийтийн газар бага насны хүүхэд төөрөхөөс сэргийлэн хөтөлж явах, төөрсөн хүүхэд таарсан үед болон гэмт хэрэг, зөрчлийн талаарх мэдээ мэдээллийг цагдаагийн байгууллагад нэн даруй мэдэгдэж хамтран ажиллана уу.

    НИЙТИЙН ХЭВ ЖУРАМ ХАМГААЛАХ ОЛОН НИЙТИЙН

АЮУЛГҮЙ БАЙДЛЫГ ХАНГАХ АЛБА