Мөрдөн байцаах албаны хамт олон Цагдаагийн ерөнхий газрын даргын тушаалаар цэргийн байнгын тэтгэвэрт гарсан  алба хаагч нартаа хүндэтгэл үзүүлэн ёслолын үйл ажиллагаа зохион байгууллаа.

Энэ үйл ажиллагаанд Мөрдөн байцаах албаны удирдлагууд,  алба хаагчдын төлөөлөл, тэдний гэр бүл үр хүүхдүүд оролцож, албаныхаа тугийг залан, ёслолын жагсаал жагсан баяр хүргэсэн юм. 

Дүн шинжилгээ, үнэлгээ, хяналт шалгалтын хэлтсийн мэдээлэл судалгаа, дүн шинжилгээ хариуцсан чиглэлийн ахлах мөрдөгч, цагдаагийн хурандаа Д.Сүрэн: Миний хувьд анх Сүхбаатар дүүргийн  цагдаагийн хэлтэст 1995 онд  дэслэгч цолтой томилогдсноос хойш улсад 27 жил ажиллажээ. Үүнээс Мөрдөн байцаах албандаа 23 жил хоёр сар ажиллаад өөрийн хүсэлтээр цэргийн байнгын тэтгэвэрт гарч байна. Ахлах мөрдөгч, тасгийн дарга, хэлтсийн дарга гээд цагдаагийн байгууллагын нэгжээс  ажлын гараагаа эхлэн томилогдсон газар болгондоо олон сайхан хамт олонтой ажиллаж явснаа энэ өдөр эргээд дурсахад сайхан байна. Энэ хугацаанд үеийн үеийн удирдлагуудаасаа  их зүйл сурч мэдэж, хамт олонтойгоо олон ажлын ард гарч байсан. Цаашид ч энэ албандаа зүрх сэтгэлээ зориулж явна гэж боддог. Нэг л мэдэхэд цаг хугацаа өнгөрч, цэргийн байнгын тэтгэвэрт гарах болдог юм байна. Бидэнд ийм сайхан хүндэтгэл үзүүлж байгаа Мөрдөн байцаах албаны  удирдлагууд, алба хаагч нартаа баярлалаа.

Мөн хэлтсийн хяналт шалгалт хариуцсан чиглэлийн ахлах мөрдөгч, цагдаагийн дэд хурандаа Д.Болормаа: Хүн бүхэнд мартахын аргагүй сайхан өдөр байдаг. Өнөөдөр бол миний энэ өдрүүдийн нэг боллоо. Би анх Баянгол дүүрэг дэх цагдаагийн хэлтэст дэслэгч цолтой  мөрдөн байцаагчаар томилогдож, Мөрдөн байцаах газрын Хүнд гэмт хэрэгтэй мөрдөх хэлтэс, Чиглэлийн ахлах мөрдөгч, Зохион байгуулалттай тэмцэх газар ахлах мэргэжилтэн гээд  өнөөдрийг хүртэл эрчүүдтэйгээ мөр зэрэгцэн олон хариуцлагатай алба хашиж байлаа. Хамгийн гол нь зөвхөн энэ албандаа 20 гаруй жил ажилалаа.  Миний аав Монгол улсын гавьяат хуульч, цагдаагийн хурандаа С.Дамдин бол манай албаны хамт олны бахархал болсон сайхан буурал. Би аавынхаа ажил мэргэжлийг өвлөн авч, нэр төртэй биелүүлэн  ажилласандаа сэтгэл өндөр байна. Хамт олон маань биднийг цэргийн байнгын тэтгэвэрт гарахад ингэж хүндэтгэл дүүрэн гаргаж өгч байгаад  баярлаж, сэтгэл их хөдлөж байна.

Мөрдөн байцаах албаны мөн хэлтсийн хяналт шалгалт хариуцсан ахлах мөрдөгч, цагдаагийн дэд хурандаа Л.Лхагвадорж: Би анх 1998 онд  Төв аймгийн цагдаагийн газарт мөрдөн байцаагчаар томилогдож  байлаа. Миний томилогдсон өдөр төрсөн өдөр маань таарч их л баяр хөөртэй, хамт олонтойгоо бялуу хувааж идэж байсан маань саяхан. Энэ өдрүүдээс хойш өнөөдрийг хүртэл цагдаагийн албандаа хоёргүй сэтгэлээр зүтгэж ирлээ. Их зүйл сурч, олон сайхан насан туршийн анд нөхөдтэй болсон доо.  Цэргийн  байнгын тэтгэвэрт гарах нь нэг үгээр хэлбэл хоёр дахь амьдрал эхэллээ гэж  ярихыг би сонсож байсан. Энэ үгтэй би санал нэгтэй байна. Цаашид  эгэл жирийн иргэний хувиар ажиллаж, амьдарч албандаа зүрх сэтгэлээ зориулна гээд олон л зүйл бодогдож байна. Хүний амьдралд тохиож болох бүхнийг инээмсэглэлээр  даван туулж яваарай. Инээмсэглэл бас элэгний эм шүү дээ  гэж албаны хамт олондоо инээмсэглэл бэлэглэв. 

Ийнхүү цэргийн байнгын тэтгэвэрт гарсан алба хаагч нартаа "Монгол цагдаа" медалийг гардуулан өгч, дурсамж яриа өрнүүлэн цаашдын ажил амьдралд аз жаргал, эрүүл энх сайн сайхан бүхнийг хүсэн ерөөсөн юм.