Олон улсын болон Монголын ахмадын өдрийг тохиолдуулан өнөөдөр /2018.10.02/ Цагдаагийн ерөнхий газраас ахмад ажилтнуудаа хүлээн авч хүндэтгэл үзүүллээ. Жил бүрийн 10 дугаар сарын 1-нийг “Олон улсын ахмадын өдөр” болгохоор НҮБ-ын Ерөнхий ассамблей 1990 онд, “Монголын ахмадын өдөр” хэмээн тэмдэглэхээр Монгол Улсын Засгийн газар 1992 онд зарлаж байсан билээ.

Цагдаагийн байгууллагаас төр, түмэндээ тангараг өргөж, ард иргэдийнхээ аюулгүй байдлыг сахин хамгаалах хариуцлагатай албанд халуун сэтгэл, залуу нас, оюун ухаан, ур чадвараа зориулан чин шударгаар хөдөлмөрлөж гавьяаныхаа амралтад гарсан ахмад ажилтнууддаа хүндэтгэл үзүүлсэн юм.

Энэ үеэр зарим ахмад ажилтны сэтгэгдлийг сонссоноо хүргэж байна.

Хошууч генерал Ж.Содном: Цагдаа бол бүхний өмнө явж байдаг алба

Цагдаагийн ерөнхий газраас ахмадуудаа хүлээн авч, өргөн хүндэтгэл үзүүлж байгаад их баярлалаа. Би цагдаагийн гаралтай хүн. Цагдаад 20 гаруй жил ажилласан, энэ байгууллагаасаа тэтгэвэртээ гарсан хүн. Манай цагдаагийн байгууллага бол төрийн түүхэн уламжлалтай, хамгийн хатуу, хүндийг үүрч, бүхний өмнө явж байдаг  алба. Энэ байгууллагынхаа ажлыг сайн мэдэх хүний хувьд хэлж байна. Онцгой байдлын газар хүртэл байхгүй байхад бид л  үүрэг гүйцэтгэж байсан. Манай цагдаа ажил, алба бүхэнтэй холбоотой байсан. Гал түймэр, усны үер, халдварт өвчин гарсан ч л манай цагдаагийнхан өмнө нь зогсож байдаг байлаа. Одоо бол манай цагдаад ажиллах бололцоо бүрдсэн, бүрэн техникжсэн, боловсон хүчнээр хангагдсан, унаа машин, тоног төхөөрөмжөөр дутагдах юм байхгүй болж. Ганцхан эрхэм зорилго бол төр, ард түмнийхээ өмнө хариуцлагатай, маш шударга, үнэн зөв ажиллах шаардлага тулгарч дээ.

Л.Билгээ: Орон нутгийн цагдаагийн газруудад ажиллаж залуу үетэйгээ уулзсан

ЦЕГ-ын Ахмадын хороон дарга, хурандаа

Өнөөдөр түүхэн үйл явдал болж байна. Бидэнд хүндэтгэл үзүүлж байгаа Цагдаагийн ерөнхий газрын удирдлагууддаа талархал дэвшүүлье. Манай Ахмадын хорооны гишүүдийн 70-80 хувь нь удирдах албан тушаалд ажиллаж байсан хүмүүс байдаг. Бид залуу үедээ сургаж, зөвлөх, хамтын ажиллагааг идэвхжүүлэхэд хувь нэмрээ оруулан ажиллаж байна. Өнгөрөгч онд Өвөрхангай, Дундговь, Баянхонгор аймаг дахь Цагдаагийн газарт очиж залуу үедээ сургамж, зөвлөгөө өгч, арга туршлагаа хуваалцан, хичээл сургалт орсон. Энэ үйл ажиллагаа цаашид үргэлжилнэ. Ингээд монголын цагдаагийн байгууллагад ажиллаж байгаад гавьяаны амралтаа авсан генерал, хурандаа, офицер, бага бүрэлдэхүүнд баярын мэнд дэвшүүлж, сайн сайхныг хүсэн ерөөе.

Хүндэтгэлийн үйл ажиллагаанд хүрэлцэн ирсэн ахмадуудад Цагдаагийн “Сүлд” чуулгын уран бүтээлчид уран бүтээлийн тоглолтоо өргөн барьж, ахмадууд сугалаанд оролцож азтанууд бэлэг гардсан юм.

ЦЕГ-ХМТ