Цагдаагийн байгууллагын 97 жилийн ойн хүрээнд бэлтгэв.

Өнөөдөр цагдаагийн байгууллагын 97 жилийн ойн баярын өдөр. Төр, ард түмэндээ тангараг өргөж, түүндээ эзэн байж түмэн олныхоо энхийн манаад нүд цавчдаггүй эгэл баатруудын төлөөлөл Цагдаагийн дэслэгч Б.Жанчивдоржтой баярынх нь өдөр ярилцсанаа хүргэе. Тэрбээр Хан-Уул дүүргийн Замын цагдаагийн хэлтэст зохицуулагчаар ажиллахаас гадна жудо бөхийн Олон улсын хэмжээний мастер цолтой тамирчин.

-Цагдаагийн байгууллагын ойн баярын мэнд хүргэе. Баяраа яаж тэмдэглэх гэж байна?

-Баярлалаа. Цагдаагийн алба хаагчид аливаа баярыг тэмдэглэхдээ баярын хурлаа хийж, сайн ажилласан нэгнээ шагнан урамшуулж тэмдэглэдэг. Тэр ёсоор л баярлан өнгөрүүлэх байх аа.

-Ер нь цагдаагийн алба хаагчид “баярлаж чаддаггүй” болов уу. Баяр болгоноор өндөржүүлсэн бэлэн байдалд өргөн бүрэлдэхүүнээр ажилладаг шүү дээ.

-Хүн л юм чинь баярыг аль болох гэр бүлийнхэнтэйгээ тэмдэглэхийг боддог, тэмдэглэдэг. Хэдийгээр өндөржүүлсэн бэлэн байдалд ажилладаг ч бүтэн өдөржин, шөнөжин ажиллахгүй шүү дээ. Ээлжээр амарна. Харин амралтын цаг хугацаагаа маш сайн ашиглаж, тэр хугацаандаа л гэр бүлийнхэнтэйгээ баярладаг даа. Наадмаар гэр бүлээрээ Төв цэнгэлдэх орж хуушуураа идчихнэ, цагаан сараар  ажлаасаа буугаад аав, ээждээ очоод золгочихно. Ажил, амьдралаа зохицуулаад бид баярлаж сурсан.

-Цагдаагийн алба төрд тангараг өргөсөн өндөр хариуцлагатайн дээр аврал эрсэн нэгнийг хамгаалж, тусладгаараа баатарлаг сайхан. Таны хувьд төрийн энэ албатай ажил амьдралаа ямар байдлаар холбосон бэ?

-Би 2006 онд “Хүч” спорт хороонд Дэд ахлагч цолтой тамирчнаар орсон. 2013 оныг хүртэл хороондоо тамирчин байгаад, Замын цагдаагийн алба гэх энэ том байгууллагад тушаалаар шилжин ажиллаж эхэлсэн. Одоо ХУД-ийн Замын цагдаагийн хэлтэст  Дэслэгч цолтой Зохицуулагчаар ажиллаж байна.

-Хөдөлгөөн зохицуулагч нарт хүндрэлтэй зүйлс их тохиолддог нь анзаарагддаг л даа. Тухайлбал, гадны зочид ирсэн үед, төрийн хамгаалалттай автомашинууд явж байхад зам хаахад жолооч нар дургүйцэж, цагдаа нар луу дайрч байгаа нь харагддаг.

-ХУД “Чингис хаан” нисэх буудалтай ойр бролохоор гадны зочид төлөөлөгчид дүүргийн нутаг дэвсгэрээр заавал дайрч өнгөрдөг. Тиймээс замыг хэсэгчлэн хаах зэргээр дээрээс ирсэн тушаалын дагуу бид үүрэг гүйцэтгэдэг. Энэ үед иргэд бухимдах нь бий. Манай иргэд жаахан хүлээцтэй хандах хэрэгтэй юм шиг санагддаг. Тушаалын дагуу үүрэг гүйцэтгэж байгаа болохоор цагдаагийн алба хаагчид руугаа дайрах нь өөрийгөө дэмий бухимдуулж байгаа хэрэг. Өдөржин, шөнөжин зам хаачихгүй, 2-3 минутын асуудал болохоор хүлээцтэй байгаасай гэж хүсдэг. Гадны зочид манай улсад ирж багай нь улсын маань хөгжилд нэмэртэй,  гадны орнуудад Монгол улсыг сурталчилж байгаа хэрэг гэдэг талаас нь эерэгээр бодох хэрэгтэй гэж боддог доо.

-Жолооч нарын гаргасан таагүй харилцаанаас үүдэн бухимдах тохиолдол олон байх даа.

-Малгайг нь цохиод унагаахад, нүүр лүү нь салаавч тулгахад бухимдахгүй хүн гэж хаа байх вэ. Цагдаа ч гэсэн хүн шүү дээ. Гэхдээ бид бухимдсан иргэнийг дагаж бухимдаж, гал дээр тос нэмэн дүрэлзүүлж болохгүй. Бид хүлээцтэйгээр, үүргээ гүйцэтгэх үүрэгтэй. Цагдаагийн нэг л албан хаагчийн таагүй үйлдэл “Монголын цагдаагийн байгууллага”-ын нэр хүндийг тэр чигт нь унагах аюул бий. Сүүлийн үед бичлэг хийгээд фэйсбүүкт тасалж тавьдаг, түүгээрээ бусдын нэр хүндийг унагадаг хүмүүс мэр сэр байх болж. Цагдаа юм чинь бичлэг хийж байхад яаж ч чадахгүй, бичлэгээрээ айлгана гэсэн хандлагатай хүмүүс цөөнгүй байна. Тиймээс өөрийнхөө буруугүйг батлах бичлэг бидэнд бас хэрэгтэй болох үе бий.  Тэгэхгүй л бол цагдаа буруудна. Ер нь зөв ч бай, буруу ч бай цагдаа л бурууддаг болчихоод байна. (инээв) “Би цагдаа” гээд бусдыг айлгаж болохгүй бас бусдаас айж болохгүй. Жанжин шугамаараа үүргээ л гүйцэтгэнэ.

-Бахархалтай бас бухимдал ихтэй алба юм.

-Бөх хүн наадамд түрүүлээд ямар мэдрэмж авах вэ, бахдалтай сайхан биз? Бидний ажил яг л тийм, бахархалтай сайхан. Өнгөрсөн шөнө хөршийн тань гэрт асуудал үүсч, цагдаа очоод хүний амь аварч. Үүнийг хэн ч мэдээгүй. Цагдаа мэдэгдэх гэж олонд зарлах ч үгүй. Өөрөөр хэлбэл, цагдаа нар чимээгүй гавьяа байгуулагчид. Баатар гэчихэж бас болохгүй л байх даа (инээв)

-Гавьяа ихтэй алба хаагчдад шагнал урамшуулал хэр их байдаг бол?

-Цагдаагийн байгууллага алба хаагчдаа шагнаж, урамшуулдаг. Боломжоороо алба хаагчдаа орон  байр, гэрээр хангадаг. Энэ дэмжлэг нь олон залуу алба хаагчдын амьдралд хөшүүрэг болж байгаа. Үүнээс гадна иргэдийн талархал, урмын сайхан үгс хамгийн том шагнал болдог.

-Миний хувьд барилддаг болохоор уралдаан тэмцээнд яваад ирэхээр хамт олон маань баярлаж бахархан угтах нь хамгийн сайхан санагддаг. “Ажилдаа санаа зоволгүй, амжилттай сайн яваад ирээрэй” гээд арыг минь даагаад үлдэх шиг сайхан зүйл тамирчин хүнд хаа байх билээ.

-Цаг нар хомстой цагдаагийн алба хаагч томоохон тэмцээнд амжилт гаргах нь тийм ч амар биш байх. Бэлтгэл сургуулилтаа хэзээдээ хийдэг вэ?

-Ажлаа хийгээд, заваараа бэлтгэлээ хийдэг. Харин тэмцээнд явах тохиолдолд хэд хоногийн өмнөөс ажлаас чөлөөлж, бэлтгэл хийх боломжийг маань олгодог. Ер нь ажлынхаа хажуугаар бэлтгэл хийдэг тамирчин, байнга бэлтгэл хийдэг тамирчинг харьцуулахад төвөгтэй л дөө. Тамирчдын хэлдгээр форм нь арай л өөр.

-Цагдаа хүн цагийн найз гэж нэг үг бий. Ямар учиртай юм бол? 

Мэдэхгүй, тэр цагдаа ажилтай байгаад утсаа аваагүй юм болов уу (инээв)

-Танд дахин баярын мэнд хүргэе.

Баярлалаа, Цагдаагийн байгууллага үүсч хөгжсөний ойн баярын  мэндийг нийт алба хаагчиддаа хүргэе. Тэр дундаа Замын цагдаагийнхаа мөрдөс нэгт хамт олон, удирдлагууд, ахмадууддаа баярын мэнд хүргэе. 

Эх сурвалж: Time.mn сайт