Увс аймаг дахь цагдаагийн газраас   ЦЕГ-ын Урьдчилан сэргийлэх хэлтсээс Монгол улсын хэмжээнд зохион байгуулж байгаа “ХҮҮХЭД ХАМГААЛАЛ” үндэсний аяны хүрээнд олон ажил зохион байгуулж байна.

Увс аймгийн Гэмт Хэргээс Урьдчилан Сэргийлэх Ажлын Салбар Зөвлөлийн дэмжлэгтэйгээр “Гэр бүлийн хүчирхийллийг таслан зогсоож, хүүхдийг гэмт хэргээс урьдчилан сэргийлье” уриалгыг хэрэгжүүлэх ажлын хүрээнд Увс аймаг дахь Цагдаагийн газраас санаачлан Улаангом сумын  Ерөнхий боловсролын Сургуулийн дунд “ Хүүхдийн эсрэг хүчирхийллийг таслан зогсооё” дэвжээ тэмцээн зохион байгууллаа.

Энэ үйл ажиллагаанд 66 багш сурагчид оролцож, Тэргүүн байран шалгарсан багт шилжин явах цом, Хүндэт өргөмжлөл, мөнгөн шагналаар тус тус шагнасан юм. Энэ үйл ажиллагаанд Ойрад хөгжимт драмын театр, Аймгийн Прокурорын газар, Боловсрол, соёл урлагийн газар хамтран  оролцож, өсвөрийн сэргийлэгч 50 сурагч  үйл ажиллагааны  явцад  дэг журам сахиулж ажиллаа. 

Мөн  Баян-Өлгий аймаг дахь цагдаагийн газраас  хүүхдийн хүмүүжлийг төлөвшүүлэх, үүрэг, хариуцлагыг нэмэгдүүлэх, тодорхой төрлийн гэмт хэрэгт өртөхөөс урьдчилан сэргийлэх анхан шатны мэдлэг олгох зорилгоор Өлгий сумын ерөнхий боловсролын сургуулийн ахлах ангийн сурагчдын дунд “Бид ирээдүйн манлайлагчид” сэдэвт зөвлөгөөн аймгийн Хөгжимт драмын театрт зохион байгуулагдлаа.

Зөвлөгөөнд Өлгий сумын удирдлагууд болон Шүүх, Прокурор газар, Цагдаагийн газар, Гэр бүл, хүүхэд, залуучуудын хөгжлийн газар, Эрүүл мэндийн газар, Ерөнхий боловсролын бүх сургуулиуд, Дэлхийн зөн олон улсын байгууллагын Баян-Өлгий аймаг дахь салбар болон төрийн бус байгууллагууд оролцож, холбогдох чиглэлээр мэдээ, мэдээлэл өглөө.

Зөвлөгөөнд 500 гаруй сурагч оролцсон бөгөөд хүмүүжилтэй зөв хүн болж төлөвших, мэдлэг, боловсролоо дээшлүүлэх нь ирээдүйн манлайлагч болох үндэс  суурь гэдэг мэдлэг эзэмшлээ.