АЛБАН ЖУРМЫН ДААТГАГЧДЫН ХОЛБООТОЙ ХАМТРАН АЖИЛЛАХ САНАМЖ БИЧИГ БАЙГУУЛАВ

2018-01-14 00:00:00

1688

Замын цагдаагийн албаны дарга, цагдаагийн хурандаа Д.Амарсайхан, Албан журмын даатгагчдын холбооны гүйцэтгэх захирал Д.Цэвээнжав нар өнөөдөр хамтран ажиллах санамж бичигт гарын үсэг зурлаа.

Монгол Улсын Замын хөдөлгөөний аюулгүй байдлын тухай хууль, Жолоочийн даатгалын тухай хууль болон бусад хууль тогтоомж, дүрэм, журмын хэрэгжилтийг хангах, байгууллага хоорондын ажлын уялдааг сайжруулах, жолоочийн сахилга, хариуцлага соёлыг дээшлүүлэх, хамтран ажиллах үйл ажиллагааны хүрээг тогтоох зорилгоор хоёр тал хамтын ажиллагааны “Санамж бичиг”-ийг байгуулж байгаа юм.
“Жолоочийн даатгалын тухай” хууль нь анх 2011 онд батлагдаж, 2012.01.01-ний өдрөөс хэрэгжиж эхэлсэн бөгөөд энэ үеэс зам тээврийн ослын улмаас бусдын амь нас, эрүүл мэнд, эд хөрөнгөнд учирсан хохирлыг нөхөн төлүүлэх, хохирогчийн эрхийг хамгаалах үйл ажиллагаанд ахиц гарсан. Тухайлбал: 2015-2017 онд буюу сүүлийн 3 жилийн хугацаанд нийслэл хотын хэмжээнд нийт 264644 зам тээврийн осол бүртгэгдсэн бөгөөд үүний 75333 буюу 28 хувь нь жолоочийн даатгалын тусламжтайгаар асуудлаа шийдвэрлүүлсэн байна.

Энэхүү санамж бичгийн хүрээнд зам тээврийн осол, хэргийг бууруулах, түүнээс урьдчилан сэргийлэх, осол гарах болсон шалтгаан нөхцөлийг тогтоох чиглэлээр судалгаа хамтран хийх, жолоочийн даатгалд хамрагдах, түүний ач холбогдлын талаар олон нийтэд сурталчлан таниулах жолоочийн даатгалын тухай хуулийн хэрэгжилтийг хангуулах чиглэлээр хяналт, шалгалтын ажлыг хамтран зохион байгуулах, даатгалын шуурхай албаны үйл ажиллагааг идэвхжүүлэх, даатгалын тохиолдлын үзлэг хийх шуурхай албаны ажилтныг сургаж дадлагажуулахад мэргэжил арга зүйн туслалцаа үзүүлэх, даатгалын байгууллагаас даатгалын тохиолдлыг бие даан шалгаж шийдвэрлэхэд албаны зүгээс дэмжин ажиллах чиглэлээр хамтран ажиллах юм.

ШИНЭ МЭДЭЭ