Уулзалтын үеэр талууд хоёр орны цагдаа, хууль сахиулах байгууллагуудын харилцаа хамтын ажиллагааг хөгжүүлэх боломж, чиглэлийн талаар харилцан санал, мэдээлэл солилцсон бөгөөд хурандаа Алаа Абу Рукун Израйль улсын Үндэсний цагдаагийн ерөнхий газрын даргаас ирүүлсэн хамтын ажиллагааны тодорхой саналуудыг агуулсан албан захидлыг манай талд албан ёсоор гардуулж өглөө. Мөн хурандаа Алаа Абу Рукун Израйль улсын цагдаагийн байгууллагын иж бүрэн дүрэмт хувцсыг Монгол Улсын цагдаагийн байгууллагын музейд хадгалуулахаар хүлээлгэж өгсөн.

Израйль Улсаас Монгол Улсад суугаа Элчин сайдын яамны Батлан хамгаалахын болон зэвсэгт хүчний атташе, хурандаа Алаа Абу Рукун нь Монголын эзэнт гүрний түүхийн тодорхой асуудлыг судалж, докторын зэрэг хамгаалсан нэгэн бөгөөд өөрийнхөө судалгааны ажил дээр үндэслэн цагдаагийн байгууллагын алба хаагчдад лекц уншиж, санал бодлоо солилцох санаачлага гаргасан юм. Түүний энэхүү санаачлагыг хүлээн авч, дээрх албан уулзалтын дараагаар түүний “Хүлэг хааны удирдсан цэрэг дайны ажиллагаа: Тагнуулын урлаг” сэдвээр уншсан лекцийг ЦЕГ-ын Гадаад Харилцааны хэлтсээс зохион байгуулж,  цагдаагийн  алба хаагчдыг хамруулсан юм.

Хурандаа Алаа Абу Рукун нь Хүлэг хааны Ойрхи Дорнодод удирдан явуулсан цэргийн ажиллагааны үед ашигласан тагнуулын ажлын арга тактикуудын талаар Израйлийн батлан хамгаалахын салбарын оюутан, сонсогчдод цуврал хичээл зааж байсан гэдгээ дурьдаад, өөрийн орны түүхийг сайтар судалж, түүгээр бахархаж байхыг лекцэнд хамрагдсан алба хаагчдад захиж байлаа.