Улаанбаатар хотын Цагдаагийн газар, нийслэлийн Иргэдийн төлөөлөгчдийн хурал, нийслэлийн Боловсролын газар, Монголын Сурагчдын холбоо, “School police” төв хамтран зохион байгуулж буй “Сургуулийн эргүүл-2016” дэвжээ тэмцээний хоёр дугаар шатны шалгаруулалт өчигдөр /2016.12.13/ Улаанбаатар чуулгын их танхимд боллоо.

Тэмцээний тэргүүн байранд Хан-Уул дүүргийн “Буянт-Ухаа” цогцолбор сургуулийн “Цэц” баг шалгарч, өргөмжлөл, 400.000 төгрөгөөр шагнуулав. Хоёрдугаар байр эзэлсэн Сонгинохайрхан дүүргийн 62 дугаар сургуулийн “Альфа” баг  өргөмжлөл, 300.000 төгрөг, гуравдугаар байр эзэлсэн Чингэлтэй дүүргийн 50 дугаар сургуулийн “Сэтгэшгүй  сэтгэлгээ”  баг өргөмжлөл, 200.000 төгрөгийн шагнал хүртлээ.

Хоёрдугаар шатны шалгаруулалтад нэгдүгээр шатны тэмцээнд шалгарсан Баянгол дүүргийн 28 дугаар сургууль, Хан-Уул дүүргийн 15 дугаар сургууль, Сүхбаатар дүүргийн дөрөвдүгээр сургууль, Баянзүрх дүүргийн  88 дугаар сургууль, Чингэлтэй дүүргийн тавдугаар сургууль, Сонгинохайрхан дүүргийн 122 дугаар сургууль, Налайх дүүргийн “Голомт” цогцолбор, Багануур дүүргийн “Гүн галуутай” цогцолбор, Багахангай дүүргийн Багахангай цогцолбор сургуулийн баг оролцсон.

Тэмцээнд оролцсон багуудыг мэндчилгээ, багийн болон багийн ахлагч нарын эрх зүйн мэдлэг сорих асуулт, хариулт, жүжигчилсэн тоглолт, сургуулийн эргүүлийг зохион байгуулж буй үйл ажиллагааг сурталчилсан байдал зэрэг таван шалгуур үзүүлэлтээр дүгнэжээ. 

Энэхүү тэмцээнийг нийслэл хотод хэрэгжиж буй  “Сургуулийн эргүүл”-ийн журмыг сурталчлах, эргүүлийн үйл ажиллагааг идэвхжүүлэх, гэмт хэргээс урьдчилан сэргийлэх ажилд ерөнхий боловсролын сургуулийн багш, нийгмийн ажилтан, сурагч, эцэг эхчүүдийн хамтын ажиллагаа, оролцоог нэмэгдүүлэх болон сургуулийн аюулгүй орчинг бүрдүүлэх зорилгоор зохион байгуулсан юм.