Өмнөговь аймгийн харьяат иргэн Б нь энэ сарын 28-ны өдөр “Тоёота приус” машинд их хэмжээний мөнгөн ус тээвэрлэн Баянзүрх дүүргийн наймдугаар хорооны нутаг дэвсгэрт зорчиж байсныг цагдаагийн алба хаагчид илрүүллээ.

Иргэн Б нь 40 кг мөнгөн ус тээвэрлэж явжээ. Уг хэргийг Баянзүрх дүүрэг дэх цагдаагийн гуравдугаар хэлтсийн Эрүүгийн тасагт шалгаж байна.

Хэдхэн хоногийн өмнө Баянгол дүүргийн нутаг дэвсгэрт ОХУ болон Монгол Улсын иргэд 64.4 кг мөнгөн ус тээвэрлэж явсан нь замын цагдаагийн албаны алба хаагчдын шалгалтын үеэр илэрснийг цагдаагийн байгууллагад Эрүүгийн хуулийн 241 дүгээр зүйлийн 214¹.1-д  зааснаар эрүүгийн хэрэг үүсгэн шалгаж байгаа билээ.

Тус зүйл анги /Эрүүгийн хуулийн 214¹.1/-д Химийн хорт болон аюултай бодисыг зөвшөөрөлгүйгээр экспортлох, импортлох, хил дамжуулан тээвэрлэх, үйлдвэрлэх, хадгалах, худалдах, худалдан авах, тээвэрлэх, ашиглах болон бусдад дамжуулсан бол хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл гурван жил хүртэл хугацаагаар хорих ял шийтгэнэ гэж заасан байдаг.

Энэ төрлийн гэмт хэрэгт холбогдогчдын олонх нь ашиг олохын тулд гэж мэдүүлдэг байна. Иймд амар хялбар аргаар мөнгө олох зорилго өвөрлөж, өөрийн болон бусдын амь нас, эрүүл мэнд, амьдралыг эрсдэлд оруулан хориотой, хорт бодис тээвэрлэх, зарж борлуулахыг завдах зэрэг болчимгүй үйлдэл хийхгүй байхыг цагдаагийн байгууллагаас сэрэмжлүүлж байна.