"ЦАГДАА" СЭТГҮҮЛИЙН ШИНЭ ДУГААР ХЭВЛЭГДЭН ГАРЛАА

2016-01-06 00:00:00

2328

Дэлхий ээж цасан хучлагаа хучиж эх оронд минь өвөл цаг иржээ. Цасан гэгээ татуулсан энэ өдрүүд бидэнд шинэ оноо угтаж, хуучин оноо үдэн ололт амжилтаа бататган, алдаа оноогоо цэгнэх торгон агшин болж үлдэж байна. Дуудлага бүхэн хариуцлагатай, дурсамж бүхэн маань зовлон жаргалтай, бүтээн байгуулсан, санаачилсан, хэрэгжүүлсэн бүхэн маань өргөжин дэлгэрэхийн үргэлжлэл болон шинэ он гарлаа.
Сэтгүүлийнхээ энэ удаагийн дугаараараа бид 2015 оны 4-р улиралд болсон онцлох үйл явдлуудыг тоймлон, гэрлэх ёслолын ордонд хуримаа хийсэн алба хаагчдынхаа мардагдашгүй агшнуудыг эргэн дурсаж, “Дугаарын зочин”-оороо ЦЕГ-ын Дотоод хяналт шалтгалт, аюулгүй байдлын асуудал хариуцсан дарга, дэд комисаар Ц. Ням-очирыг урьж, “Томилолт” буландаа Дорноговь аймаг дахь цагдаагийн газар , Говь-Сүмбэр аймаг дахь цагдаагийн хэлтсийн алба хаагчдын ажил амьдралыг сурвалжилан, “Шинэ аян” буландаа Улаанбаатар хотын цагдаагийн газрын Гэр бүлийн хүчирхийлэл хүүхдийн эсрэг гэмт хэргээс урьдчилан сэргийлэх хэлтсээс зохион байгуулж байгаа “Бүтэн хайрыг гэр бүлдээ” аяны талаар дэлгэрэнгүй ярилцлага бэлтгэн хүргэлээ.

Дугаарын сурвалжлагаараа сэтгүүлч Г.Улсболдын Баян-зүрх дүүргийн цагдаагийн 2-р хэлтсээс бэлтгэсэн “Бид тайван унтаж, тэд амар тайвныг тогтоодог” шөнийн сурвалжлага, ЦЕГ-ын төв архивын газраас хүргэдэг “Түүх-архив” булангаараа “Цагдаагийн тангараг” хэрхэн үүсэж, өөрчлөгдөн шинэчлэгдсэн талаар түүхэн эх сурвалж, “Сайн туршлага” буландаа Завхан аймаг дахь цагдаагийн газрын нэг цэгийн үйлчилгээ, “Түүхт ой” буландаа ЦЕГ-ын дэргэдэх “Хүч спорт” хорооны 70-н жилийн талаар өгүүлж, “Соён гэгээрүүлэх ажил” буландаа Хамгаалалтын нэгдүгээр газраас зохион байгуулсан “Авьяастны эрэлд” урлагийн наадмын тухай тус тус нийтлэлээ.

“Цагдаа” эмхтгэлийн дугаар бүрийг алгасалгүй уншиж, он цагийн хүрдийг хамтдаа товчоолон бүтээдэг алба хаагч бүхэндээ шинэ оноо амжилт бүтээлээр дүүрэн байхын ерөөл өргөе.
АМАР ТАЙВАН АМЬДРАЛЫН ТӨЛӨӨ ХАМТДАА