"ЦАГДАА"  СЭТГҮҮЛИЙН ШИНЭ ДУГААР ХЭВЛЭГДЭН ГАРЛАА

Эх орныхоо дөрвөн зүг найман зовхист ард иргэдийнхээ амар амгалангийн манаанд зогсож, өргөсөн тангарагтаа үнэнчээр ажиллаж байгаа алба хаагчдынхаа амрыг эрье. Цагдаагийн байгууллагын үйл ажиллагааны хүрээнд хийгдсэн томоохон ажлуудыг тоймлон хүргэдэг “Цагдаа” эмхтгэлийнхээ 2015 оны эхний дугаарыг хүргэж байна.
Энэ удаагийн дугаараараа бид МУ-ын Засгийн газрын гишүүн,  Хууль зүйн сайд С.Дорлигжавын 2015 оны 03 дугаар сарын 20-ний өдрийн А/64 дүгээр тушаалаар "Цагдаагийн албан тушаалын цол олгох журам"-ыг баталлаа, Эрүүгийн хуулийн төслийг боловсруулан УИХ-д өргөн барьсан талаар ХЗЯ-ны ахлах мэргэжилтэн  Г.Оюунболдтой хийсэн ярилцлага,  ЦЕГ-ын даргын Катар, Хятад улсад хийсэн айлчилал, техникийн шинэчлэлийн хүрээнд ЦЕГ-ын Мэдээлэл технологийн төвөөс хийгдэж байгаа зайны сургалт, цахим хурал  service.police.gov.mn цахим хуудас, Тусгай ажиллагааны газрын 25-н жилийн ойд зориулсан  мэдээлэл зэргийг нийтлэлээ.
Мөн  албаны бахархал  болсон цагдаагийн бэлгэ тэмдгийн учир утга, бүтсэн түүх, иргэд мэдээлэл дуудлагаа хянах боломжтой болсон шинэ үйлчилгээ, албаараа гоёсон эрхэмсэг бүсгүйчүүдийн талаар сурвалжлага, энэ цаг үеийн үгийн ур ухааныг дархлаач, их соён гэгээрүүлэгч, зохиолч яруу найрагч, шашин соёлын тэргүүн хамба лам, бурхан ч лам зэрэг эрхэм хүмүүсийн та бүхэнд урам дэм хайрласан,   дүнжгэр үгсээр дүүрэн “Цагдаа хүн ихэмсэг биш, эрхэмсэг байг” номын  дээжээс хураангуйлан хүргэхийг зорьлоо.
Энэ удаагийн дугаарын зочноор  Монгол улсад 1944 онд шинээр нэвтэрсэн цэргийн дээд цол  ГЕНЕРАЛ цол олгож эхлэсний 71-н жилийн “Генерал цолонд хүндэтгэл үзүүлэх өдөр”-ийг угтаж, цагдаагийн байгууллагаас төрөн гарсан генералуудаа урьж  алба хаагч нартайгаа уулзуулж, “Харих болоогүй аав” булангаараа  ЦЕГ-ын СДТ-ийн албаны сургалтын хэсгийн дарга, цагдаагийн хошууч Ц.Дашдэмбэрэлийн ажил амьдралыг сурвалжилан хүргэж байна.
“Цагдаа” эмхтгэлийн шинэ дугаар бүр алба хаагч та бүхний хийж бүтээсэн ажлын үр дүн,  үйлс бүхнээр бүтэж эвлэдэг болохоор үүргээ нэр төртэй биелүүлэн ажиллаж байгаа  алба хаагч бүхэндээ ажлын амжилт хүсэе.
 АМАР ТАЙВАН АМЬДРАЛЫН ТӨЛӨӨ ХАМТДАА