• Нүүр хуудас
  • Системүүд
  • Харьяа нэгжүүд
  • Холбоо барих
  • Асуулт хариулт
  • Иргэний хяналт

Цагаан шонхороо дээдэлсэн цагдаа

2019-07-19
Цагаан шонхороо дээдэлсэн цагдаа

Эх сурвалж: www.npost.mn

Цагдаагийн байгууллагын 98, Дотоодын цэргийн 97, Эрүүгийн цагдаагийн албаны 85 жилийн түүхт ойг тохиолдуулан “Шилдэг мөрдөгч” буландаа Сонгинохайрхан дүүрэг дэх цагдаагийн I хэлтсийн Хэрэг бүртгэх тасгийн мөрдөгч, цагдаагийн ахлах дэслэгч А.Цэенрэгзэнг онцоллоо.

Жирийн л нэг өдрүүдийг жинхэнэ аз жаргалтай  дүүргэх нь хувь хүнээс өөрөөс нв шалтгаалдаг гэдгийг бид мэднэ. Залуу хүн мөрөөдлийнхөө төлөө уйгагүй зүтгэвэл хүрэх газраа хүрдэг учиртай. Цагдаагийн ахлах дэслэгч А.Цэенрэгзэн дунд сургуулийн сурагч байхаасаа эхлээд л “Би цагдаа болно” гэсэн хүсэл мөрөөдлийн эзэн байж, энэ  мөрөөдлөөсөө хазайлгүй аравдугаар ангиа төгсөөд цагдаа дамжаанд орж суралцан, амжилттай төгсчээ.

Сонгинохайрхан дүүрэг дэх цагдаагийн I хэлтсээс ажлын гараагаа эхлэн эргүүлийн жижүүрийн, хороон цагдаагаар ажиллаж, 2010  онд дэд ахлагч цолтой, хэлтсийнхээ хөдөлмөрийн аварга болж, үүнээсээ урам авч  сургуульд суралцан офицер болох зорилго тавьж, Цагдаагийн академид таван жил суралцжээ. Хүний амьдралд тусалж дэмждэг, зөв зааж чиглүүлдэг хамт олон, удирдлага маш чухал үүрэгтэй. Жижүүрийн цагдаа байхаасаа эхлээд Сонгинохайрхан дүүрэг дэх цагдаагийн I хэлтэстэйгээ ажил амьдралаа холбоод 13 жил болж байна. Хамт олноосоо их зүйл  сурсан гэж бахархан яриж байлаа. Тэрбээр “Энэ бүхнээс хорооны цагдаа байсан үе маань хамгийн сайхан даа. Тэр үеийн залуус бид хэрэг илрүүлж, гэмт хэргээс урьдчилан сэргийлэхийн тулд  бие биетэйгээ уралдаж, түрүүлбэл баяр хөөр болж, хоцорвол урам хугараад шартай байсан даа. Энэ бүхний үр дүнд бие биенээсээ суралцаж, хичээж зүтгэж явсанаа санахад сайхан байдаг юм. Дэд ахлагч цолтой хэлтсийнхээ хөдөлмөрийн аварга болсон цагаас хойш офицер болно гэсэн зорилгодоо хөтлөгдөөд 2009 онд цагдаагийн академид шалгалт өгөөд эчнээ ангид суралцсан. Таван жил суралцаад 2014 онд төгсөөд тоо бүртгэлийн чиглэлээр хоёр жил ажилласан. Суралцаж байх хугацаандаа жижүүрийн болон хорооны цагдаа, тоо бүртгэлийн чиглэлээр ажилласан юм. Хийж байгаа ажил, хамт ажиллаж байгаа мөрдөс нэгтэй нөхдүүд маань чадах бүхнээ харамгүй зааж сургасны үр дүнд өдий зэрэгтэй яваа гэж бэлгэшээн бодох дуртай.  Сүүлийн таван жил хэрэг бүртгэх албанд ажиллаж байна даа. Хийж байсан ажил бүхэн маань Хэрэг бүртгэх тасгийн мөрдөгчийн ажилд тэнцэж ажиллах суурь нь болсон гэж боддог. 2014 онд тасагтаа мөрдөгчөөр ажиллаад хоёр жил дараалан хэлтсийнхээ аварга болоод, 2018 онд албаныхаа шилдэг мөрдөгч болсондоо урам зориг дүүрэн байдаг юм. Цаашдаа ч хичээнэ.  Хамт олны маань тус их юм даа. Хороон дээр ажиллаж байхад хэсгийн байцаагчтайгаа хамтран судалгаа хийж, олон хүнтэй харьцаж байсан маань өөрөө яг хэрэг шалгаад эхлэхээр их хэрэг болдог. Хороон дээр 60-70 шахам судалгаа байдаг. Энэ олон төрлийн судалгааны дагуу урьдчилан сэргийлэх зүйл их хийдэг байсан” гэж даруухан ярилаа.

Эгэл жирийн ажилчин аав, ээжийн 10 хүүхэдтэй айлын долоо дахь хүү нь болон мэндэлж, төрийн цагдаа хэмээх хүндтэй, нэр төртэй албанд хоёргүй сэтгэлээр зүтгэж яваа олон залуусын нэг түүнд цаашид ч хийж бүтээх хүслээр дүүрэн  олон мөрөөдөл байна. Гэргий Б.Баттуяатайгаа  10 жилээсээ үерхээд одоо гурван охинтой болжээ. Түүний гэргий Дотоодын цэргийн 801 дүгээр ангид ажилладаг. Гэр бүл, эцэг эхдээ хайр хүндлэл дүүрэн хандвал ажил үйлс өөдрөг байдаг гэж боддог. Тэд маань ажил төрлийг маань дэмжиж, ойлгож байж ажлаа сайн хийнэ. Бусад залуусын жишгээр төрийн албандаа зүтгэхэд, ээж маань хүүхдүүдийг сайхан өсгөж өглөө. Манай цагдаагийн алба, тэр дундаа Хэрэг бүртгэх алба маань хичээж, зүтгэж байгаа хэний  ч хүүд ээлтэй алба даа гэж сэтгэл дүүрэн өгүүлж суулаа. Гэр бүлээрээ цагдаа, дотоодын цэргийн албандаа зүтгэж байгаа залуустаа ажлын амжилт хүсье.