• Нүүр хуудас
  • Системүүд
  • Харьяа нэгжүүд
  • Холбоо барих
  • Асуулт хариулт
  • Иргэний хяналт

ЦАГДААГИЙН ХУРАНДАА Ш.ДОРЖПАЛАМ: ДУНД СУРГУУЛЬД СЭРГИЙЛЭГЧ ХӨТӨЛБӨРИЙГ ХЭРЭГЖҮҮЛЭХЭЭР АЖИЛЛАЖ БАЙНА

2014-10-10

 

MASS.MN сайтын хамт олон төрийн байгууллагыг иргэдэд таниулах, үйл ажиллагааг нь олон нийтэд хүргэх зорилго бүхий ажлыг эхлүүлж байна. Манай кампанит ажлын эхний байгууллагаар Цагдаагийн ерөнхий газар болон харьяа газар, хэлтсүүд оролцохоор боллоо.  Хууль зүйн шинэчлэлийн хүрээнд цагдаагийн бие бүрэлдэхүүн өөрчлөгдөн, хэлтсүүдийн тоо нэмэгдэн, байршил нь ч солигдсон. Олон нийтийн тусын тулд бид энэ бүх мэдээллийг та бүхэндээ хүргэх болно. Энэ удаа Баянгол дүүргийн Цагдаагийн хоёрдугаар хэлтсийн дарга, цагдаагийн хурандаа Ш.Доржпаламтай уулзаж ярилцлаа.

-Баянгол дүүргийн цагдаагийн хоёрдугаар хэлтэс ямар байршилд үүрэг гүйцэтгэдэг вэ?

-Баянгол дүүргийн цагдаагийн хоёрдугаар хэлтэс нь нэгдүгээр хороо, 3-9 дүгээр хороо, 13, 20 дугаар хорооны нутаг дэвсгэрт гэмт хэрэгтэй тэмцэх, нийгмийн хэв журмыг сахиулахан ажил үүргээ гүйцэтгэж байна. 

-Танай хэлтэс хичнээн алба хаагчидтай вэ?

-Манай хэлтэс 100 гаруй алба хаагчидтайгаар үүргээ гүйцэтгэж байна. 

 
 Баянгол дүүргийн хувьд баар цэнгээний газар их байдаг шүү дээ. Гэмт хэргийн гаралтын хувьд ямар байдаг вэ?

-Манай дүүргийн онцлог нь караоке, баар цэнгээний газар буюу архи согтууруулах ундаагаар үйлчилдэг аж ахуй нэгжүүд олон байдаг. Тийм учраас согтуугаар үйлдэгдсэн гэмт хэргийн гаралт хамгийн өндөр байдаг. Энэ жил тусгай зөвшөөрөлгүй, цаг хэтрүүлэн ажилласан хэд, хэдэн үйлчилгээний газрын үйл ажиллагааг зогсоосноор согтуугаар үйлдэгдэх гэмт хэргийн гаралт өмнөх үеийнхээс буурсан үзүүлэлттэй байгаа.

-Цагдаагийн албаны тухай шинэ хууль батлагдан гарсантай холбогдуулан танай хэлтэс ямар, ямар үйл ажиллагааг зохион байгуулж байна вэ?

- Цагдаагийн байгууллагын шинэчлэл, цагдаагийн албаны тухай шинэ хууль батлагдан гарсантай холбогдуулан манай хэлтэс хэд, хэдэн үйл ажиллагааг зохион байгуулан ажиллаж байгаа. Ялангуяа ард иргэдтэйгээ хамтын ажиллагаагаа бэхжүүлэх, ард иргэдийн хүчийг гэмт хэрэгтэй тэмцэх ажилд татан оролцуулах зэрэг ажлуудыг дүүргийн Засаг даргын тамгын газар, Нийслэлийн цагдаагийн газартай хамтран зохион байгуулж байна. 

-Ард иргэдийг гэмт хэрэгтэй тэмцэх ажилд татан оролцуулж байна гэлээ. Яг ямар ажлыг зохион байгуулж байна?

- Байгууллага, аж ахуй нэгжийн эргүүл, оюутны эргүүл гэх мэт ард иргэдийг гэмт хэргээс урьдчилан сэргийлэх ажилд татан оролцуулж байгаа.

 Энэ онд ямар, ямар ажлыг хийхээр төлөвлөж байна вэ?

- Энэ оны хувьд гэвэл оюутны эргүүлийн ажлыг эрчимжүүлж ажиллах төлөвлөгөөтэй байна. Мөн ЕБС-д  сэргийлэгч хөтөлбөрийг хэрэгжүүлэхээр ажиллаж байна. Уг хөтөлбөрийг хэрэгжүүлснээр сургууль орчимд буюу насанд хүрээгүй хүүхдийг гэмт хэрэгт уруу татах ажиллагааг таслан зогсооно гэж бодож байна.