• Нүүр хуудас
  • Системүүд
  • Харьяа нэгжүүд
  • Холбоо барих
  • Асуулт хариулт
  • Иргэний хяналт

БАЯНХОНГОР АЙМГИЙН ЦАГДААГИЙН ГАЗРААС МЭДЭЭЛЖ БАЙНА

2016-04-06
БАЯНХОНГОР АЙМГИЙН ЦАГДААГИЙН ГАЗРААС МЭДЭЭЛЖ БАЙНА

БАЯНХОНГОР АЙМГИЙН ЦАГДААГИЙН ГАЗРААС МЭДЭЭЛЖ БАЙНА


Баянхонгор аймгийн цагдаагийн газраас аймгийн Иргэдийн төлөөлөгчдийн хурал, Гэмт хэргээс урьдчилан сэргийлэх ажлыг зохицуулах зөвлөлтэй хамтран "Гэр бүлийн хүчирхийлэл, гэмт хэргээс урьдчилан сэргийлэхэд нийгмийн түншлэлийн багийн ажлын үр дүн, хамтын ажиллагааг бэхжүүлэх нь" аймгийн гуравдугаар зөвлөгөөнийг зохион байгууллаа.
Зөвлөгөөний эхний өдөр Хүүхэд, гэр бүл хөгжлийн хэлтсийн дарга, Ж.Дуламсүрэн “Гэр бүлийн хүчирхийллийн тухай ойлголт”, мөн хэлтсийн мэргэжилтэн Ц.Мягмарсүрэн “Гэр бүлийн үнэ цэнэ” чуулганы үеэр авсан судалгааны нэгдсэн дүнг танилцуулж, Баянхонгор аймаг дахь Цагдаагийн газрын дарга, цагдаагийн хурандаа Б.Оюутболд “Гэр бүлийн хүчирхийллийн улмаас үйлдэгдсэн гэмт хэргийн өнөөгийн нөхцөл байдал, цаашид авч хэрэгжүүлэх арга хэмжээ”-ний талаар мэдээлэл хийсэн юм.
Баянхонгор аймгийн 19 сум, 9 багийн 7 хүний бүрэлдэхүүнтэй “Нийгмийн түншлэлийн баг”-ууд зөвлөгөөнд оролцож, 2016 оны 04 дүгээр сарын 01-ний өдөр “Гэр бүлийн үнэ цэнэ” сургагч багш бэлтгэх 5 багц хичээлийн сургалтанд хамрагдсан байна. Зөвлөгөөнийг зохион байгуулсан ажлын хэсгээс “Нийгмийн түншлэлийн баг”-ийн гишүүдэд зориулсан “Урлагийн тоглолт”-ыг зохион байгуулжээ.


Зөвлөгөөний хоёр дахь өдөр Улсын их хурлын гишүүн, Хууль Зүйн Байнгын Хорооны дарга Д.Ганбат, Хууль Зүйн Байнгын Хорооны ахлах зөвлөх Б.Баасандорж, Цагдаагийн ерөнхий газрын Гэмт хэрэгтэй тэмцэх албаны ахлах мэргэжилтэн цагдаагийн дэд хурандаа Г.Арсланхуяг, Цагдаагийн ерөнхий газрын Нийтийн хэв журам хамгаалах албаны ахлах мэргэжилтэн, цагдаагийн ахмад Я.Наранбаасан, Хүчирхийллийн эсрэг үндэсний төвийн дарга Д.Энхжаргал, Хүүхдийн төлөө үндэсний газрын мэргэжилтэн Б.Ариунтуяа нар урилгаар оролцож, зөвлөгөөнд оролцогчдод мэдээлэл хийсэн.
2016 оны 04 дүгээр сарын 02-ны өдөр “Гэр бүлийн хүчирхийлэлтэй тэмцэх тухай хуулийн үзэл баримтлал”, “Гэр бүлийн хүчирхийллийн өнөөгийн байдал, цаашид авч хэрэгжүүлэх арга хэмжээ”, “Гэр бүлийн хүчирхийллээс шалтгаалсан гэмт хэрэг, зөрчилтэй тэмцэх цагдаагийн байгууллагын үйл ажиллагаа, гадаадын орны туршлага”, “Хүүхдийн эсрэг хүчирхийлэл” зэрэг сэдвүүдээр мэдээлэл хийлээ..
2015 онд гэр бүлийн хүчирхийлэлтэй тэмцэх чиглэлээр хийж хэрэгжүүлсэн ажил, аймгийн 2 дугаар зөвлөгөөний үр дүнг үнэлж, дүгнэн 2016-2017 оны ажлын төлөвлөгөөг гаргаж, 2015 онд хэрэгжүүлсэн ажлын үр дүнгээр эхний 3 байранд шалгарсан “Нийгмийн түншлэлийн баг”-уудад болон бусад албан тушаалтнуудад Иргэдийн төлөөлөгчдийн хурал, Цагдаагийн газар, Хүүхэд, гэр бүл хөгжлийн хэлтсээс шагнал гардууллаа гэж БАЯНХОНГОР АЙМАГ ДАХЬ ЦАГДААГИЙН ГАЗАР-аас бидэнд мэдээллээ.